अक्टोबर १५ भित्र ठोस प्रगति नभए ब्रेक्जिट वार्ताबाट अलग हुने बेलायतको चेतावनी

0SHARES

२२ भाद्र २०७७ नेपाल टाईम्स

२२ भदौ, काठमाडौं । अक्टोबर १५ भित्र पनि ठोस प्रगति नभए ब्रेक्जिट वार्ताबाट अलग हुने बेलायतका प्रधानमन्त्री बोरिस जोन्सनले चेतावनी दिएका छन् ।

उनले युरोपेली युनियनबाट बेलायतको बहिर्गमन (ब्रेक्जिट)का सन्दर्भमा युनियनसँग कुनै सम्झौता नभए पनि त्यो बेलायतका लागि फलदायी हुने बताए । बेलायती अधिकारीहरु र युरोपेली युनियनका प्रतिनिधिबीच ब्रेक्जिटपछि बेलायत र युरोपेली युनियनबीचको व्यापार तथा अरु सम्बन्धका विषयमा वार्ता जारी छ ।

तर दुवै पक्ष आ(आफ्ना अडानमा रहेकाले ठोस प्रगति हुन सकेको छैन । प्रधानमन्त्री जोन्सनले युरोपेली वार्ताकारहरुले आफ्नो अडानमाथि पुनर्विचार नगर्ने हो भने बेलायतले युरोपेली युनियनसँग वार्ता गर्नुको कुनै अर्थ नहुने बताएको बीबीसीले जनाएको छ ।

बेलायत गएको जनवरी ३१ मा युनियनबाट बाहिरिएको थियो । युनियनमा अहिले २७ देश सदस्य छन् । राजनीतिक रुपमा ब्रेक्जिटमा सहमति भए पनि ११ महिनाको सङ्क्रमणकाल अवधि आउँदो डिसेम्बर ३१ मा सकिँदैछ । सम्झौता हुन नसके बेलायत र ईयूबीच कर र अन्य आर्थिक गतिविधिमा समस्या आउनेछ । वार्तामा युरोपेली डुंगाहरुलाई बेलायती जलक्षेत्रमा माछा मार्न पहुँच दिने वा नदिने तथा उद्योगहरुलाई सरकारी अनुदान प्रदान गर्ने वा नगर्ने भन्नेमा समस्या उत्पन्न भएको छ ।

ईयूले भने बेलायती कम्पनीमाथि वातावरणीय पक्ष, कार्यस्थलको मापदण्ड र सरकारी अनुदान उपलब्ध गराउने विषयमा बेलायत स्पष्ट हुनुपर्ने जिकिर गर्दै आएको छ ।

विज्ञापन बक्स