अफगानिस्तानमा करिब ४० हजार बालबालिका नियमित खोपबाट वञ्चित

0SHARES

१८ कार्तिक २०७७ नेपाल टाईम्स

१८ कात्तिक, एजेन्सी । अफगानिस्तानमा झण्डै ४० हजार बालबालिका नियमित खोप सेवा लिनबाट वञ्चित भएका छन् ।

पाँच वर्षमुनिका झण्डै दुई लाख ६५ हजार बालबालिकालाई नियमित खोप दिनुपर्ने तर तालिवानी विद्रोहीको पकड रहेको क्षेत्रमा ४० हजार बालबालिका दादूरा लगायतका रोगविरुद्धको नियमित खोपबाट वञ्चित भएका सरकारको दाबी छ ।

वादखशान प्रान्तमा तालिवान समूहले लगाएको प्रतिबन्धका कारण सरकारी गतिविधि सञ्चालन हुन नसक्दा ती बालबालिका नियमित खोप लिनबाट वञ्चित भएको प्रान्तीय जनस्वास्थ्य निर्देशक नुर खवारीले जानकारी दिए । उनका अनुसार तालिवान समूहको प्रभावक्षेत्रमा खोप कार्यक्रम प्रभावित भएको छ ।

सरकारले ४० हजार बालबालिकालाई घर घरमा पुगी खोप दिने अभियान थालेको थियो तर यमगन, रघुस्तान, दारा-ए-खुस्तक, जुर्म र वारजुजका केही क्षेत्रमा खोप कार्यक्रम प्रभावित हुँदै आएको छ । तालिवानका प्रवक्ता जाबिहुल्ला मुजाहिदले सरकारको दाबी आधारहीन रहेको र केही बालबालिकाका अभिभावक आफैँले खोप दिन अस्वीकार गरेको बताएको खबरमा उल्लेख छ ।

अफगानिस्तानको सरकारले देशभरका ६१ लाख बालबालिकालाई पोलियो विरुद्धको खोप दिने गरी अभियान चलाएको छ ।

विज्ञापन बक्स