अर्घाखाँचीमा भएको जीप दुर्घटनामा मृत्यु हने तीनमध्ये एकको सनाखत

२० आश्विन २०७६

२० असोज, सन्धिखर्क । अर्घाखाँचीको नरपानीमा भएको जीप दुर्घटनामा मृत्यु हने तीन जनामध्ये एक जनाको सनाखत भएको छ ।

मृत्यु हुनेमा अर्घाखाँचीको ढाकाबाङ्ग स्थायी घर भएका र हाल दाङ लमही बस्दै आएका ५० वर्षीय घनश्याम खनाल रहेका छन् । मृत्यु हुनेमा एक महिला र एकजना पुरुषको सनाखत हुन बाँकी रहेको अर्घाखाँची प्रहरी प्रमुख प्रहरी नायब उपरीक्षक प्रकाश विष्टले जानकारी दिए ।

सोमबार दिउँसो लंका यातायात प्रालिको जीप दुर्घटना हुँदा तीन जनाको घटनास्थलमै ज्यान गएको थियो । दुर्घटनामा ६ जना घाइते भएका छन् । घाइते मध्ये २ जनाको अवस्था गम्भीर रहेको छ ।

कपिलवस्तुको गोरुसिंगेबाट सन्धिखर्क आउँदै गरेको लु १ ज ४३२९ नम्बरको जीप सन्धिखर्क नगरपालिका वडा नम्बर–६ नरपानी नजिकै दुर्घटनामा परेको थियो । जीपमा नौ जना सवार रहेको प्रहरीले जनाएको छ ।

दुर्घटनामा घाइते हुनेहरू जीप चालक कपिलवस्तु बुद्धभूमिका वीरेन्द्र श्रेष्ठ, भुमिकास्थान–१०, धनचौरका उमेश रेग्मी, दाङ लमही–५ की अनिता खनाल र बिन्दु खनाल, भुमिकास्थान–१० की सीमा रेग्मी र उनका १ वर्षीया छोरा आदित्य रेग्मी घाइते रहेका छन् । घाइतेमध्ये चार जनालाई उपचारको लागि चौराह अस्पताल बुटवल पठाईएको छ ।

जीप ओरालो सडकमा अनियन्त्रित भई सडकदेखि साढे तीन सय मिटर तल खसेको थियो । घटनास्थलमै पुगेर प्रमुख जिल्ला अधिकारी विजयराज पौडेल, जिल्ला प्रहरी कार्यलयका प्रमुख प्रकाश विष्ट, सशस्त्र प्रहरी बलका प्रहरी नायव उपरीक्षक माधब रेग्मीसहितको टोलीले उद्धार गरेको हो ।

Facebook Comments

विज्ञापन बक्स