आईओएम कार्यालयको ताला प्रहरीले खुलायो, एमबीबीएसको प्रवेश परीक्षा आगामी २१ गते नै हुने

१८ भाद्र २०७६

भदौ १८, काठमाडौं । आईओएमको कार्यालयमा विद्यार्थीहरुले लगाएको ताला प्रहरीले खुलाएको छ । ताला खोलिएपछि एमबीबीएसको प्रवेश परीक्षा तोकिएकै मिति आगामी २१ गते नै हुने शिक्षा मन्त्रालयले जनाएको छ ।
प्रवेश परीक्षा पूर्व्निर्धा्रित मितिमै गर्नका लागि ताला खुलाइएको शिक्षा मन्त्री गिरिराजमणि पोखरेलको सचिवालयले जनाएको छ ।

यसअघि शिक्षासम्बन्धी विभिन्न माग राखी चिकित्साशास्त्र अध्ययन संस्थान महाराजगञ्जको स्ववियु र बिभिन्न विद्यार्थी संगठनहरुले तालाबन्दी गरेका थिए । चिकित्सा शिक्षा ऐनले प्रावधान गरेको ७५ प्रतिशत छात्रवृत्ति यसै शैक्षिक सत्रबाट लागू गराउनुपर्नेलगायतका माग विद्यार्थीहरुले राखेका छन् ।

राष्ट्रिय चिकित्सा शिक्षा ऐन २०७५ कार्यान्वयनको चरणमा रहेको भन्दै शिक्षा मन्त्रालयले विज्ञप्ति जारी गरेको भोलिपल्टै प्रहरीले ताला खुलाएको हो । मन्त्रालयका प्रवक्ता बैकुण्ठ अर्यालका अनुसार ऐनमा व्यवस्था भएबमोजिम चिकित्सा शिक्षा आयोगमा उपाध्यक्ष नियुक्त गर्ने, चिकित्सा शिक्षा नियमावली तर्जुमा गर्नेलगायतका कामका लागि प्रक्रिया अघि बढेका छन् ।

चिकित्सा शिक्षा ऐनले ७५ प्रतिशत निःशुल्क छात्रवृत्ति सुनिश्चित गरे पनि नियमावली नबनेको, चिकित्सा शिक्षा आयोगको उपाध्यक्ष नियुक्त नभएकोलगायतका कारण तत्काल विद्यार्थीहरुको कतिपय माग कार्यान्वयन गर्न नसकिने मन्त्रालयका अधिकारीहरु बताउँछन् ।

यसैगरी ऐनको दफा १७ को उपदफा ५ र ७ आपसमा बाझिने खालको भएकाले पनि तत्काल कार्यान्वयनमा कठिनाइ भएको एक अधिकारीले बताए । उनले भने, ‘चिकित्सा शिक्षा ऐनअन्तर्गत चिकित्सा शिक्षा आयोग नबने पनि, ऐन कार्यान्वयनका लागि नियमावली नबने पनि र ऐनमा छात्रवृत्तिको व्यवस्था तोके बमोजिम हुने छ भनेर लेखिए पनि आजै लागू र्ग भनेर लागू गर्न सक्ने अवस्था छैन । त्यसको लागि आवश्यक प्रक्रिया पूरा गर्दै जानुपर्ने हुन्छ ।’

Facebook Comments

विज्ञापन बक्स