इन्धनकाे पैसा नतिरेपछि मयुरकाे बस समातियाे, किस्ता तिर्न बैंककाे ताकेता

0SHARES

२९ माघ २०७५ नेपाल टाईम्स

काठमाडौं ,माघ २९

यातायात समितिहरूकाे सिन्डिकेट अन्त्यका लागि महत्वपूर्ण भूमिका खेलेर चर्चामा आएको मयुर यातायातकाे व्यवस्थापनमा समस्या देखिएकाे छ । मयुर यातायात प्राइभेट लिमिटेडले बसहरू खरिदहरूकाे किस्ता र खर्चहरू समयमै तिर्न नसक्दा बसहरु धमाधम समातिन थालेका छन् ।

इन्धन भरेको रकम समयमै तिर्न नसकेपछि स्वयम्भूस्थित हामा आयल प्राइभेट लिमिटेड (हामा पेट्राेल पम्प) ले मयुरकाे एउटा बस समातेर राखेकाे छ । उक्त पेट्राेल पम्पले मयुरको बा ५ ख १५३७ नम्बरको बस समातेको हाे । १६ लाख रुपैंया बक्यौता रकम नतिरेपछि बस पक्राउ गर्न परेको पम्पले जनाएको छ । पेट्राेल पम्पका अनुसार मयुर यातायातका ४४ वटा बसले हामामा नियमित इन्धन भर्दै आएको आएको थियो, तर उधारोमा भरेकाे तेलकाे पैसा नतिरेपछि बस नै समात्नु परेको पेट्राेल पम्प स्राेतले जानकारी दिएकाे छ । मयुरले समयमै रकम नतिरे अन्य बसहरु पनि समात्ने पम्पले जनाएको छ ।

उता, सवारी बिक्रेता कम्पनी सिप्रद्धी ट्रेडिङ प्रा.लि.ले कम्पनीका ९ वटा बस जफत गरेको छ । किस्ता समयमै नतिरेपछि कम्पनीले बस जफत गरेको हो । ट्रेडिङका सिनियर अफिसर किृष्ण चन्दले सवारी मर्मतको रकम रोकिएपछि बस कम्पनीले समातेको बताए । चन्दका अनुसार केहि बसहरु लगिसकेको छ भने केहि बस कम्पनीमै रहेको छ । प्रा.लि.ले विवाद मिलाएर बस निकाल्ने प्रयास गरिरहेको छ ।

पम्प र बिक्रेता कम्पनी मात्र नभएर मयुर बैंककाे समेत ताराे बनेकाे छ । मयुरले बैंकबाट लिएकाे ऋणकाे किस्ता समेत नियमित रूपमा तिर्न नसकेपछि बैंकले किस्ता तिर्न ताकेता गरेकाे हाे । कम्पनीले नयाँ बस किन्नका लागि माछापुच्छ्रे बैंकबाट ५ करोड भन्दा बढी रकम लिएको बताइएकाे छ । तर बैंकमा पनि निरन्तर किस्ता तिर्न नसकेको बैंक स्रोतले विकान्युजलाई जानकारी दियाे । किस्ता रकम समयमै नआए धितोमा रहेको बस नै कब्जा गर्ने रणनीति बैंकले लिएको छ ।

मयुर यातायातमा मोहन श्रेष्ठ, गोपाल कुमार थापा लगायत गैरआवासीय नेपालीहरुको लगानी रहेको छ । बलिया लगानीकर्ता र यात्रुकाे राेजाइमा पर्न सफल भए पनि यातायातमा खर्च प्रणालीमा व्यवस्थापन गर्न नसक्दा मयुरमा समस्या आएको बताइएको छ । केही शेयरधनीको खराब गतिविधिको कारण यातायात समस्यामा परेको बताइएको छ ।

यातायात क्षेत्रमा १ नम्बर कम्पनी बन्ने दाबी गर्दै आएको प्रा.लि.का अध्यक्ष मोहन श्रेष्ठ पछिल्लो समय सम्पर्कविहीन छन् । उपत्यका सहित देशभर यातायात सेवा विस्तार गर्ने रणनीति लिएको यातायात प्रा.लि.ले इलेक्ट्रिक बस समेत सञ्चालन गर्ने तयारी गरको थियो ।(विकास न्युजबाट)

विज्ञापन बक्स