उखु किसानको बक्यौता नतिर्ने उद्योगी खोजी गरिदिन गृहलाई पत्राचार

0SHARES

१९ कार्तिक २०७७ नेपाल टाईम्स

१९, कात्तिक, काठमाडौं ।

उद्योग, वाणिज्य तथा आपूर्ति मन्त्रालयले उखु किसानको बक्यौता नतिर्ने उद्योगी खोजी गरिदिन गृह मन्त्रालयलाई पत्राचार गरेको छ ।

उद्योग मन्त्रालयले गत वर्ष माघ १८ मा उखु किसानसंग भएको सम्झौता बमोजिम किसानलाई रकम भुक्तानी गरेको विवरण नबुझाउने उद्योगी खोजिदिन गृहसँग सहयोग मागेको हो ।

मन्त्रालयकी सहप्रवक्ता उर्मिला केसीले केही उद्योगीले किसानलाई पैसा दिएको र केहीले पैसा दिन बाँकी रहेको बुझिएको बताउँदै भनिन् – ‘किसानलाई भएको भुक्तानीको सबै विवरण पनि हामीलाई प्राप्त भएको छैन, त्यसैले उद्योगीलाई बोलाइएको हो ।’

मन्त्रालयका अनुसार अन्नपूर्ण, इन्दिरा, महालक्ष्मी र श्रीराम सुगर मिलका सञ्चालकलाई सम्पर्कमा ल्याइदिन उद्योग मन्त्रालयले पत्राचार गरेको हो ।

किसानले गत वर्ष पुसमा काठमाडौंमा गरेको लामो आन्दोलनपछि उद्योगीबाट किसानले लिन बाँकी रकम उठाइदिने सहमति उद्योग मन्त्रालयले गरेको थियो । पुस १८ गते उद्योगीले मन्त्रालयमा गरेको प्रतिबद्धताअनुसार माघ ७ गतेसम्म उद्योगीले सबै बक्यौता रकम किसानलाई तिर्नुपर्ने थियो ।

मन्त्रालयले किसानसंग गरेको सहमतिअनुसार माघ ६ गतेसम्म महालक्ष्मी सुगर मिलले ११ करोड ५० लाख, अन्नपूर्णले ३ करोड ९० लाख र इन्दिरा सुगर मिलले ७४ लाख रुपैयाँ भुक्तानी गरेको विवरण मन्त्रालयसंग छ ।

इन्दिरा र अन्नपूर्ण सुगर मिलका सञ्चालक राकेश अग्रवाल हुन् भने महालक्ष्मी सुगर मिलका सञ्चालक वीरेन्द्र कनोडिया हुन् । उक्त भुक्तानीपछि इन्दिरा र अन्नपूर्णले किसानलाई २१ करोड ३८ लाख तथा महालक्ष्मी सुगर मिलले १० करोड ९० लाख रुपैयाँ र गोल्छा समूहले सञ्चालन गरेको श्रीराम सुगर मिलले २७ करोड रुपैयाँ किसानलाई भुक्तानी दिन बाँकी रहेको मन्त्रालयले जनाएको छ ।

विज्ञापन बक्स