‘ए’ डिभिजन लिग : जावलखेल र हिमालयन शेर्पाले अंक बाँडे

२९ माघ २०७६

२९ माघ, काठमाडौँ ।
शहीद स्मारक ‘ए’ डिभिजन लिगको १२औं चरणको अन्तिम खेलमा हिमालयन शेर्पा र जावलाखेल युथ क्लबले बुधबार ३–३ गोलको बराबरी खेलेका छन् । ललितपुरको सातदोबाटोस्थित एन्फा कम्प्लेक्समा भएको खेलमा हिमालयनले पहिलो हाफमा लिएको ३–१ को अग्रतालाई अन्तिम समय सम्म कायम राख्न नसक्दा अंक बाँडेको हो ।

दोस्रो हाफमा जाउलाखेलले दुई गोल थप्दै तीन–तीनको बराबरी गर्दै १÷१ अंक बाँडेका हुन् । खेलको पाँचौ मिनेटमा स्टेफेन समिरले गोल गर्दै शेर्पालाई सुरुआती अग्रता दिलाएका थिए । २६औं मिनेटमा विजय श्रेष्ठले गोल थप्दा हिमालयनले अग्रता अग्रता दोब्बर पारेको थियो । ३५औं मिनेटमा जावलाखेलका गोलरक्षक अरुण ब्लोनले रातो कार्ड पाएपछि जावलाखेल १० खेलाडीमा सिमित भएको थियो । काउन्टरमा आएको बललाई पेनाल्टी क्षेत्र भन्दा बाहिर समातेपछि रेफ्री प्रकाशनाथ श्रेष्ठले अरुणलाई रातो कार्ड देखाएका थिए ।

पहिलो हाफको इन्जुरी समयमा जावलाखेलका खेलाडी कुबेर बिष्टले गोल गर्दै खेल अग्रता छोट्याएका थिए । त्यसको केही समयपछि स्टेफेनले व्यक्तिगत दोस्रो गोल गर्दै हिमालयन शेर्पालाई ३–१ को अग्रता दिलाए । खेलको ६०औं मिनेटमा जावलाखेलका फोडे फोफानाले एक गोल गरे भने रुपबहादुर लामाले एक गोल थपे ।

बराबरीसँगै जावलाखेलले १२ खेलमा १९ अंक जोडेको छ । जावलाखेल लिगको पाँचौ स्थानमा छ । समान खेलबाट ११ अंक जोडेको हिमालयन शेर्पा ११औं स्थानमा छ ।

बुधबारको खेल सँगै सहिद स्मारक ए डिभिजिन लिगमा अन्तिम चरणका खेल बाँकी रहेका छन् । अहिले सम्मको लिग समिकरणमा विभागीय टोली त्रिभुवन आर्मी २९ अंकका साथ तालिको शीर्ष स्थानमा रहँदा मच्छिन्द्र २८ अंकका साथ तालिकाको दोस्रो स्थानमा छ । यी दुईको भिडन्ता लिगकोअ अन्तिम खेलमा हुनेछ । जुन खेल उपाधिका लागि निर्णायक खेल भएको छ । उक्त खेलमा आर्मीले मच्छिन्द्रलाई बराबरीमा रोके पनि आर्मी च्याम्पियन हुनेछ भने मच्छिन्द्रले पराजित गरे मच्छिन्द्र उपाधि विजेता हुनेछ ।

विज्ञापन बक्स