नेपाल टाईम्स 
विराटनगर,साउन ३
विराटनगरस्थित कोशी अञ्चल अस्पतालाई शिक्षण अस्पतालका रुपमा विकास गरिने भएको छ । प्रदेश १ को सरकारले काठमाडौंस्थित वीर अस्पतालसँगको सहकार्यमा यसै वर्षदेखि अञ्चल अस्पताल कोशीमा एमडीको अध्ययन अध्यापनको तयारी गर्न लागेको हो ।
विराटनगरमा विहीबार पत्रकार सम्मेलन गरी सामाजिक विकास मन्त्रालयले कोशी अञ्चल अस्पताललाई शिक्षण अस्पतालका रुपमा विकास गर्न लागिएको जानकारी दिएको हो । सामाजिक विकासमन्त्री जीवन घिमिरेले साउनको अन्तिम साताबाट एमडीका लागि विद्यार्थी भर्ना लिएर यसै वर्षदेखि कोशी अञ्चल अस्पतालमा पठनपाठन गर्ने तयारी भइरहेको बताए ।
कोशी अञ्चल अस्पतालाई शिक्षण अस्पतालका रुपमा विकास गर्नका लागि आवश्यक विद्यार्थी लगायतका कुरामा वीर अस्पतालसँग सहमति भइसकेको मन्त्री घिमिरेले जानकारी दिए । त्यसैगरी सामाजिक विकास मन्त्रालयले ग्रामीण क्षेत्रका गरिब तथा जेहेन्दार विद्यार्थीहरुलाई विषेश सहुलियत दिएर एम वि वि एस अध्ययन गराउने सहयोग गर्ने पत्रकार सम्मेलनमा जानकारी दिइएको थियो ।
प्रदेश सरकारले सहुलियत प्रदान गरेर एम विवियस अध्ययन गरेका चिकित्सकले कम्तिमा ५ बर्ष ग्रामिण क्षेत्रमा रहेर करारमा स्वास्थ्य सेवा प्रदान गर्नु पर्ने प्रावधान मन्त्रालयले बनाएको छ ।
मन्त्री घिमिरेले सामाजिक विकास मन्त्रालयले हालसम्म चारबटा विधेयकको मस्यौदा तयार पारेको जानकारी दिए । उनले अब वस्ने प्रदेश सभामा ती विधेयक टेवल हुने प्रकृयामा रहेको जानकारी दिए । पत्रकार सम्मेलनमा सामाजिक विकास मन्त्रालयले मन्त्रालय गठन भएदेखि हालसम्म भएको काम कार्वाहीको बारेमा जानकारी गराईएको थियो ।
