चाँडै युद्धविराम सम्बन्धी सहमति हुने हमास अधिकारीको दाबी

162SHARES

६ जेष्ठ, एजेन्सी ।
इजरायल र गाजाका बिद्रोहीबिच एक–दुई दिनभित्रै युद्धविरामको सम्झौता हुन सक्ने हमासका एक शीर्ष अधिकारीले बताएका छन् ।

इजरायल र प्यालेस्टाइनबिच आक्रमण जारी रहेका बेला हमासका शीर्ष अधिकारीले हिंसा अन्त्यका लागि सहमतिको प्रयास भइरहेको चाँडै घोषणा हुन सक्ने बताएको अन्तर्राष्ट्रिय सञ्चारमाध्यमले जनाएका छन् ।

तर इजरायलका प्रधानमन्त्री बेन्जमिन नेतन्याहूले आफ्ना नागरिकको शान्ति तथा सुरक्षा सुनिश्चित नभएसम्म आक्रमण जारी रहने बताएका छन् ।

अमेरिकी राष्ट्रपति जो बाइडेनले मानवीय तथा भौतिक क्षति रोक्नका लागि सावधानी अपनाउन इजरायललाई आग्रह गरेपछि नेतह्याहूले यस्तो बताएका हुन् ।

इजरायली सेनाले गाजामा पूर्वाधारहरुलाई लक्षित गरि बिहीबार बिहानै १०० भन्दा धेरै हवाई आक्रमण गरेको छ । प्यालेस्टाइनी बिद्रोहीले इजरायलमा लक्षित गरि रकेट प्रहार गरेका छन् ।

गाजाबाट आफ्नो तर्फ हालसम्म चार हजार रकेट आक्रमण भएको इजरायलले जनाएको छ । मे १० देखि सुरु भएको हिंसाका कारण हमास नियन्त्रणको गाजामा १०० भन्दा बढि महिला तथा बालबालिकासहित अहिलेसम्म कम्तीमा २२७ जनाको ज्यान गएको छ ।

इजरायलले भने मारिने मध्ये कम्तीमा १५० जना हमास लडाकु रहेको दाबी गरेको छ । तर हमासले अहिलेसम्म आफ्ना लडाकु कति मारिए भनेर कुनै तथ्यांक दिएको छैन ।

इजरायल तर्फ दुई बालबालिकासहित १२ जनाको ज्यान गएको छ । गाजा तर्फबाट रकेट तथा इजरायलले हवाई आक्रमण गर्दै आएको छ ।

इजरायली आक्रमणका कारण पहिले नै नाजुक अवस्थामा रहेको गाजाको अवस्था थप भयावह बनेको भन्दै संयुक्त राष्ट्रसंघसहितका सहायता संगठनले चिन्ता व्यक्त गरेका छन् ।

छुटाउनुभयो कि?

सम्पूर्ण