ताप्लेजुङमा मेयर कप हेर्न जानका लागि सार्वजनिक विदा

68SHARES

१३ चैत, ताप्लेजुङ । ताप्लेजुङको फुङ्लिङ नगरपालिकाले आयोजना गरेको अन्तरपालिका मेयर कपको पहिलो दिन खेल हेर्न जानका लागि शुक्रवार सार्वजनिक बिदा दिएको छ ।

न कुनै चाडपर्व न कुनै विशेष दिन, नगरपालिकाले शुक्रवारदेखि सञ्चालन गर्न लागेको मेयर कप भलिबल खेलको पहिलो दिन सार्वजनिक बिदा दिएको हो ।

नगर कार्यपालिकाको ६७ औँ बैठकले अन्तर–पालिकास्तरीय मेयर कप रनिङ भलिबल प्रतियोगिताको उद्घाटनका दिन नगर क्षेत्रभित्र बिदा दिने निर्णय भएको नगरपालिकाका प्रमुख प्रशासकीय अधिकृत बद्रीकुमार कार्कीले जानकारी दिनुभयो ।

मेयर कपकै लागि सार्वजनिक बिदा दिँदा नगर कार्यपालिकाको कार्यालय एवम् त्यस मातहतका वडा, स्वास्थ्य चौकी र सम्पूर्ण शैक्षिक संस्था बन्द हुँदा सेवाग्राही मर्कामा परेका छन् ।

मेयर कपमा सहभागी हुन ताप्लेजुङका नौ पालिकाले पालिकास्तरीय अध्यक्ष कप विजेताले मेयरकप प्रतियोगितामा भाग लिन पाउनेछ । यसअघि नै अध्यक्ष कप सञ्चालन भइसकेको छ । मेयर कपमा विजेताले दुई लाख २१ हजार एक सय रुपैयाँ र रनिङ कप पाउनेछ । उपविजेता टोलीले एक लाख ११ हजार एक सय रुपैयाँ र कप पाउनेछ भने सान्त्वना स्वरूप उत्कृष्ट दुई टोलीलाई जनही ३३ हजार रुपैयाँसहित कप प्रदान गरिने छ ।

विभिन्न विधामा उत्कृष्ट सात खेलाडीलाई समेत नगद प्रदान गर्ने नगरपालिकाले जनाएको छ ।

छुटाउनुभयो कि?

सम्पूर्ण