तिहारमा १६ लाख फूलको माला खपत, पोहोरभन्दा ३६ प्रतिशतले कम कारोबार

0SHARES

५ मंसिर २०७७ नेपाल टाईम्स

५ मंसिर, काठमाडौं । यसवर्षको चाड तिहारमा सयपत्री र मखमली गरी १६ लाख मालाको खपत भएको छ ।

अघिल्लो वर्ष झण्डै २५ लाख मालाको कारोबार भएकोमा यसवर्ष १६ लाख मात्रै मालाको कारोबार भएको फ्लोरिकल्चर एशोसिएसन नेपाल(फ्यान)ले जनाएको छ ।

यसवर्षको तिहारमा झण्डै १३ लाख सयपत्री र ३ लाख मखमली गरी १६ लाख मालाको कारोबार भएको एशोसिएसनका अध्यक्ष कुमार कसजु श्रेष्ठले जानकारी दिए । यसवर्ष सयपत्री र मखमली फूलको कारोबारमा ३६ प्रतिशतले कमी आएको छ ।

तिहारमा खासगरी फूलको धेरै कारोबार हुने गर्छ । विशेष गरी यमपञ्चकको पाँच दिनमा सयपत्री र भाइटीकाका लागि मखमली फूलको बढी कारोबार हुन्छ । तिहारमा सयपत्री फूलको प्रतिमाला ७० देखि १ सय २५ रुपैयाँसम्म र मखमलीको ५० देखि ८० रुपैयाँसम्म बजारमा कारोबार भएको छ ।

अध्यक्ष कसजुका अनुसार केही वर्ष अघिसम्म तिहारमा फूलको आयात गर्नुपर्थ्यो, तर यसवर्ष तिहारमा आवश्यक सयपत्री फूलको माला आन्तरिक उत्पादनबाटै परिपूर्ति भएको छ ।

मखमली फूलमा भने नेपाल आत्मनिर्भर रहेको छ । मखमली केही मात्रामा निर्यात समेत हुने गरेको छ । यसवर्षको तिहारमा कोरोना कहरका बीच पनि झण्डै एक लाख ५० हजार मखमली फूलको माला विभिन्न देशमा निर्यात भएकोे छ ।

यसवर्ष आन्तरिकतर्फ ११ करोड ७० लाख रुपैयाँ बराबरको सयपत्री र एक करोड ८० लाख रुपैयाँको मखमलीको कारोबार भएको छ । त्यस्तै ४५ लाख रुपैयाँ बराबरको मखमली निर्यात भएको छ । सयपत्री र मखमली गरी १३ करोड ९५ लाख रुपैयाँको कारोबार भएको एशोसियसनले जनाएको छ ।

फ्लोरिकल्चर एशोसिएसन नेपालले आर्थिक वर्ष ०७१र०७२ देखि ०७४र७५ सम्म सरकारसँगको सहकार्यमा सयपत्री फूलको उत्पादन विस्तार तथा प्रवर्द्धनका कार्यक्रम सञ्चालन गरेको थियो ।

यस कार्यक्रममार्फत विभिन्न जिल्लाहरुमा पुष्प खेती गरिरहेका पुष्प उद्यमी तथा किसानलाई छनौट गरी ६२ रोपनी भन्दा बढी क्षेत्रफलमा टनेल निर्माणमा सहयोग गरी व्यावसायिक सयपत्री फूलको उत्पादन विस्तारमा सघाउ पुर्याएको थियो । यसले थप सयपत्री फूलको उत्पादन विस्तार गर्यो ।

तर अझै पनि उत्पादन प्रविधिको विकास, भण्डारण, ढुवानी तथा बजारीकरणको क्षेत्रमा अध्ययन अनुसन्धान हुन नसकेको अध्यक्ष कसजुले बताए । यसवर्ष कोरोना महामारीले फूलको व्यवसाय विस्तारमा असर पारेको पनि अध्यक्ष कसजुको भनाइ छ ।

विज्ञापन बक्स