निजी विद्यालयलाई तोकिएको पब्लिकेशनको पुस्तक पढाउन प्याब्सन धनगढीको उर्दी

0SHARES

२० आश्विन २०७७ नेपाल टाईम्स

२० असोज, कैलाली । निजी विद्यालयको छाता संगठन (प्याब्सन) धनगढीले निजी विद्यालयमा तोकिएको पब्लिकेशनको पुस्तक पढाउन उर्दी जारी गरेको छ ।

प्याब्सन धनगढीको कार्य समितिको निर्णयअनुसार धनगढीका सबै निजी विद्यालयमा अनिवार्य रुपमा ओसन पब्लिकेशनको कम्प्युटर विषयको पुस्तक पढाउन उर्दी गरिएको हो ।

प्याब्सनको निर्णय नमान्ने विद्यालयलाई १० देखि ४० हजार रुपैयाँसम्म जरिवाना तिर्न र अबदेखि प्याब्सनका सबै निर्णय मान्न तयार छु भनेर निवेदन पेस गर्न विद्यालयलाई परिपत्र गरिएको छ ।

निर्णय नमान्ने विद्यालयलाई कडा कारबाहीको चेतावनी दिइएको छ । निर्देशन र चेतावनीबारे द गार्डनर विद्यालयका संस्थापक प्रिन्सिपल कैलाश दाहालले पत्रमा लेखिएको निर्णय र निर्देशन कानुनसम्मत छ भनेर प्रश्न गरेका छन् । प्याब्सन धनगढी अन्तर्गत ५३ विद्यालय आबद्ध छन् । प्याब्सन धनगढीका अध्यक्ष पदमबहादुर सावदले संस्थाको निर्णय पालन नगर्नेलाई कारबाही गर्न पत्र पठाएको बताए ।

उनकाअनुसार ९ वटा निजी विद्यालयले पुस्तक पढाउन अटेरी गरेका थिए । ७ वटा विद्यालयहरुले तोकिएको पुस्तक पढाउन सहमति जनाइसकेका छन् । दुई वटा विद्यालयले भने किताब पढाउन मानेका छैनन् । प्याब्सन धनगढीले अघिल्लो वर्ष आयोजना गरेको विद्यालयस्तरीय महिला क्रिकेट प्रतियोगितामा ओसन पब्लिकेशनले प्रायोजन गरेको थियो ।

प्रायोजन बापत एक लाख ५० हजार रुपैयाँ प्याब्सन धनगढीलाई दिएको थियो ।

विज्ञापन बक्स