निमित्त प्रमुखका भरमा दुई महानगर

0SHARES

२२ फाल्गुन २०७४ नेपाल टाईम्स

काठमाडौँ, फागुन २२
दुई महानगरपालिका अझै प्रमुख प्रशासकीय अधिकृतविहीन छन् । वीरगञ्ज र विराटनगर महानगरपालिकामा निमित्त प्रमुख प्रशासकीय अधिकृतबाट कामकारवाही भइरहेको संघीय मामिला तथा स्थानीय विकास मन्त्रालय, कर्मचारी प्रशासन शाखाका शाखा अधिकृत रवीन्द्र थापाले बताए ।

महानगरपालिकाका लागि प्रमुख प्रशासकीय अधिकृत हुनका लागि सहसचिवको व्यवस्था भए पनि ती दुईमा भने प्रमुख प्रशासकीय अधिकृत उपसचिव तहका छन् ।

मन्त्रालयले सामान्य प्रशासन मन्त्रालयसँग ती दुई महानगरका लागि पटक पटक सहसचिव माग गरे पनि पाउन सकेको छैन ।

विराटनगरमा उपसचिव प्रदीपकुमार निरौला र वीरगञ्जमा गोपालप्रसाद रेग्मीले निमित्त प्रमुख प्रशासकीय अधिकृत भएर काम गरिरहेका छन् ।

पहिले उपमहानगरपालिका रहेका ती दुईलाई स्तरोन्नति गरेर महानगर बनाइएदेखि नै उपसचिव प्रमुख प्रशासकीय अधिकृत भएर काम गरिरहेका छन् ।

शाखा अधिकृत थापाले ती दुई महानगरमा सहसचिव तहका प्रमुख प्रशासकीय अधिकृत पठाउने तयारी भइरहेको बताए ।
उपमहानगर र नगरपालिकामा भने उपसचिव प्रमुख प्रशासकीय अधिकृत हुने व्यवस्था गरिएको छ ।

काठमाडौँमा धनीराम शर्मा, ललितपुरमा हरिप्रसाद दाहाल, चितवनमा प्रेमराज जोशी, पोखरामा दीर्घनारायण पौडेल सहसचिव तहका प्रमुख प्रशासकीय अधिकृत छन् ।
रासस

विज्ञापन बक्स