२५ कात्तिक, काठमाडौं ।
नेपाली राष्ट्रिय महिला क्रिकेट टोली बंगलादेशको ढाकाबाट बस (सडकमार्ग) मार्फत स्वदेश फर्किने भएकाे छ । आइसिसी टि२० विश्वकप एसिया छनोट अघि अभ्यासको लागि कात्तिक १८ मा बंगलादेश भ्रमणमा गएकाे महिला टोली बसमार्फत नेपाल फर्कने तयारी गरिरहेकाे क्यानले जनाएकाे छ ।
कोरोना प्रोटोकल पालना नगर्दा बिहीबार बिहान ९ बजे काठमाडौं फर्किने उडान छुटेपछि नेपाली टोली बसमा फर्किन लागेकाे हाे । बंगलादेशको ढाकाबाट भारत हुँदै झापासम्म नेपाली महिला टोली बसमा आउने नेपाल क्रिकेट संघ (क्यान) का कार्यवाहक सचिव प्रशान्त विक्रम मल्लले जानकारी दिए ।
बंगलादेश क्रिरा शिक्षा प्रतिष्ठान (बिकएसपि) सँग तीन टि२० सिरिज २–१ ले जितेको नेपाली महिला टोली शुक्रबार सम्म नेपाल आइपुग्नेछ । नेपाली महिला क्रिकेट टोली कोरोना परिक्षण पिसिआर परिक्षण नगरि स्वदेश फर्किन लागेको कारण उडान छुट्न पुगेको हो । क्यानले यस घटनामा छानविन गरेर टिम व्यवस्थापनसँग स्पष्टिकरण सोध्ने जनाएको छ ।
बंगलादेशबाट नेपालको लागि अर्को उडान आइतबार मात्र छ । तर आइतबार नेपाली महिला टोलीले कतार भ्रमणको लागि टिकट काटि सकेको छ । त्यसैले आजनै बसबाट आउन लागेको प्रशान्तले जानकारी दिए ।
नेपाली टोलीले कार्तिक ३०, मंसिर १ र २ गते (नोभेम्बर १६, १७ र १८) मा कतारसँग तीन टि२० आई सिरिज खेल्नेछ । जुन नेपाली महिला टोलीले खेल्ने पहिलो टि२० आई सिरिज पनि हुनेछ । त्यसपछि नेपाली टोली मंसिर ३ मा युएईतर्फ लाग्ने कार्यक्रम छ।
टि२० विश्वकप एसिया छनोट मंसिर ६ देखि १२ सम्म (नोभेम्बर २२ देखि २८) सम्म हुनेछ । सन् २०२३ मा दक्षिण अफ्रिकामा हुने टि२० विश्वकपको लागि नेपालसहित ६ राष्ट्रले ग्लोबल छनोटको लागि युएईमा एसिया छनोट खेल्न लागेका हुन् । छनोटमा नेपाल, भुटान, हङकङ, कुवेत, मलेसिया र युएई गरि ६ राष्ट्र सहभागी छन् । पाँच क्षेत्रबाट ग्लोबल छनोटमा एक एक टोली पुग्नेछन् । २०२२ मा हुने ग्लोबल छनोटबाट शीर्ष दुई टोली २०२३ मा दक्षिण अफ्रिकामा हुने महिला टि२० विश्वकपमा स्थान बनाउनेछन् ।
