पक्राउ परेका निवर्तमान सभामुख महरालाई बानेश्वर प्रहरी बृत्तमा राखिने

१९ आश्विन २०७६

१९ असोज, काठमाडौं । यौन दुब्र्यवहारको आरोप लागेपछि गत सोमबार राजीनामा दिएका निवर्तमान सभामुख कृष्णबहादुर महरालाई प्रहरीले आइतबार अपरान्ह नियन्त्रणमा लिएको छ ।

उनलाई नयाँबानेश्वर प्रहरी बृत्तमा नै राखिने छ । प्रहरीको गाडी नचढ्ने महराको अडानपछि निजी गाडी लिएरै सभामुख निवास पुगेको प्रहरीले उनलाई पक्राउ गरेको हो ।

यसअघि आइतबार विहान निवर्तमान सभामुख महरालाई पक्राउ गर्न जिल्ला अदालत काठमाडौंले अनुमति दिएको थियो । संसद सचिवालयकी कर्मचारी रोशनी शाहीले बलात्कारको प्रयास गरेको आरोपमा शुक्रबार जाहेरी दिएपछि प्रहरीले महरालाई पक्राउ गर्न अदालतसँग अनुमति मागेको थियो ।

जिल्ला अदालत काठमाडौंका न्यायाधीश ब्रजेश प्याकुरेलको इजलासले महरालाई पक्राउ गरी अनुसन्धान गर्न अनुमति दिएको हो । दसैको विदा अवधिभर महरा प्रहरी हिरासतमा नै रहने स्रोतले जनाएको छ ।

असोज १२ गते आइतबार महरा रक्सीको बोतल बोकेर शाहीको डेरामा पुगेका थिए । घटना भएको भोलिपल्ट शाहीले सञ्चारमाध्यमलाई महराले आफूलाई बलात्कार र हातपात गरेको बताएकी थिइन् ।

उनको अनुहार र जिउमा चोटपटकसमेत देखिएको थियो । प्रहरी उच्च स्रोतका अनुसार सो घटना भएको राति प्रहरी उनको डेरामा पुगे पनि घटनाबारे उनले बयान दिएकी थिइन् ।

शाहीको मध्य रातको त्यो बयान पनि प्रहरीले रेकर्ड गरेर राखेको थियो । असोज १४ गते प्रहरीले शाहीको डेरामा गएर महराले ल्याएका रक्सीको बोतल, घम्साघम्सीमा भाँचिएको महराको चस्माको खुट्टा र कोठाबाट हतारमा निस्किँदा छुटेको जुत्ताको तलुवालगायत सामान प्रहरीले बरामद गरेको थियो ।

जाँचका लागि ती सामान प्रहरीको फरेन्सिक ल्याबमा पठाइसकिएको थियो । त्रिवि शिक्षण अस्पतालमा शुक्रबार नै रोशनीको स्वास्थ्य परीक्षण गरिसकिएको छ ।

Facebook Comments

विज्ञापन बक्स