पृथ्वीनारायण शाहको भूमिमा आउन पाउँदा खुशी लागेको छः हर्षवर्धन श्रृगंला

0SHARES

१२ मंसिर २०७७ नेपाल टाईम्स

१२ मंसिर, गोरखा । नेपाल भ्रमणमा रहेका भारतीय विदेश सचिव हर्षवर्धन श्रृगंला आज शुक्रबार गोरखा पुगेका छन् । भारत सरकारको सहयोगमा पुनर्निर्माण भएका तीन वटा विद्यालय भवनको उद्घाटन गर्न उनी गोरखा गएका हुन् ।

गोरखा नगरपालिका–९ लक्ष्मीबजारस्थित महालक्ष्मी माविको नवनिर्मित भवन उद्घाटन गर्दै उनले आधुनिक नेपाल स्थापना गर्ने राजा पृथ्वीनारायण शाहको भूमिमा आउन पाउँदा आफू हर्षित भएको बताए । गोरखाका मानिसहरु संसारभर बहादुरीका लागिका परिचित रहेको भन्दै उनले प्रशंसा समेत गरे ।

२०७२ सालको गोरखा भूकम्पको प्रसंगलाई जोड्दै उनले भने, ‘भूकम्पका कारण गोरखामा धेरै क्षति पुगेको थियो, भारत सरकारले नेपालीहरुको पीडा बुझेर पुनर्निर्माणमा सहयोग ग¥यो, सहयोग गर्न पाएकोमा हामी खुशी छौ ।’

श्रृगंलाले शुक्रबार गोरखा नगरपालिका–८ डुम्रीडाँडाको रत्नलक्ष्मी मावि र गोरखा नगरपालिका–१० छेवेटारको तारा माविको भवन पनि उद्घाटन गरे । महालक्ष्मी माविमा साढे ५ करोड, तारा माविमा ४ करोड ७१ लाख र रत्नलक्ष्मी माविमा ४ करोड ३३ लाख रुपैयाँ भारत सरकारको लागत परेको छ ।

विद्यालय भवन उद्घाटन गर्दै विदेशसचिव श्रृगंलाले नयाँ भवन बनेसँगै ती विद्यालयमा अध्ययनरत करिव एक हजार ६ सय विद्यार्थीलाई लाभ पुगेको बताए । जिल्लामा थप चार वटा विद्यालय भारत सरकारको सहयोगमा पुनर्निर्माणको क्रममा रहेको छ ।

‘भारत सरकारको करिव ६ सय करोड लागतमा नेपालको ९ जिल्लामा ४/४ विद्यालय भवनहरु पुनर्निर्माण भइरहेका छन्, नेपालभर २७० वटा विद्यालय र क्याम्पस भवन निर्माणका लागि पनि अनुदान प्रदान गरेको छ,’ उनले भने ।

भूकम्प पश्चात गोरखा र नुवाकोट जिल्लामा ५० हजार घर भारत सरकारको सहयोगमा पुनर्निर्माण भइरहेको उनले बताए । ‘प्रधानमन्त्री नरेन्द्र मोदीले दुई जिल्लामा गरी ५० हजार घर निर्माण गर्ने प्रतिवद्धता जनाउनुभएको थियो, त्यसमध्ये ४६ हजार घर बनिसके, बाँकी निर्माणाधीन छन्,’ उनले भने ।

स्वास्थ्य क्षेत्रमा पनि सहयोग गरेको बताउदै श्रृगंलाले नेपालको दश जिल्लामा ४७ वटा स्वास्थ्य चौकी भवन भारत सरकारको सहयोगमा बनेको जानकारी दिए । जसमध्ये ३० वटा गोरखा जिल्लामा रहेको उनको भनाइ छ । भारत सरकारले प्रत्येक बर्ष ३ हजार नेपाली विद्यार्थीलाई छात्रवृत्ति दिँदै आएको पनि स्मरण गरे ।

विज्ञापन बक्स