प्रत्यक्ष वैदेशिक लगानीलाई सहज बनाउँदै विनियमावली जारी

933SHARES

२५ जेठ, काठमाडौं ।

प्रत्यक्ष वैदेशिक लगानी नेपाल भित्र्याउनका लागि नेपाल राष्ट्र बैंकको स्वीकृति नलिए पनि हुने भएको छ ।

विदेशी लगानी तथा विदेशी ऋण व्यवस्थापन विनियमावली २०७८ जारी गर्दै राष्ट्र बैंकले वैदेशिक लगानी भित्र्याउनका लागि राष्ट्र बैंकमा निवेदन दिएर स्वीकृति लिनुपर्ने झन्झटिलो प्रक्रियाको अन्त्य गरेको हो ।

लगानीकर्ताले विदेशी लगानी स्वीकृति गर्ने निकायबाट स्वीकृति प्राप्त गरेपछि विदेशी मुद्रा नेपाल पठाउन वा भित्र्याउन राष्ट्र बैंकबाट पूर्वस्वीकृति लिन अनिवार्य नहुने विनियमावलीमा उल्लेख छ ।

तर विदेशी लगानी स्वीकृत भएपछि विदेशी मुद्रा भित्र्याउनु वा पठाउनुअघि लिखित जानकारी भने दिनुपर्नेछ । यसअघि सानो–सानो विदेशी रकम लगानी भित्र्याउन पनि राष्ट्र बैंकको स्वीकृति चाहिने थियो ।

यस्तै विदेशी लगानीबापतको मुद्रा सटहीमा पनि राष्ट्र बैंकले सजिलो बनाएको छ । विदेशी लगानी तथा आर्जित रकम फिर्ता लैजाने सटही सुविधा प्रदान गर्दा विदेशी लगानी स्वीकृत गर्ने निकाय वा सम्बन्धित निकायको स्वीकृति÷सिफारिसको आधारमा गरिने उल्लेख छ ।

लगानीको लेखाङ्कनलाई पनि सुधार गरेर कागजपत्र पूरा भएको सात दिनभित्र लेखाङ्कन गरिसक्ने बनाइएको छ । राष्ट्र बैंकको विनियमावली आएसँगै विदेशी लगानी भित्र्याउन थप सहज हुनेछ ।

छुटाउनुभयो कि?

सम्पूर्ण