प्रदेश १ का मन्त्री आङ्बुहाङलाई माओवादी केन्द्रले साेध्याे २४ घण्टे स्पष्टीकरण

752SHARES

१७ चैत, विराटनगर । पार्टी परित्याग गरी नेकपा एमाले ओली समूहमा प्रवेश गरेर प्रदेश १ का आर्थिक मामिला तथा योजनामन्त्री बनेका टङ्क आङ्बुहाङलाई नेकपा माओवादी केन्द्रले स्पष्टीकरण सोधेको छ ।

माओवादी केन्द्र संसदीय दल प्रदेश १ को सोमवार विराटनगरमा बसेको बैठकले आङ्बुहाङलाई २४ घण्टाभित्रमा पार्टी परित्याग गरेको हो होइन ? स्पष्ट खुलाउन अल्टिमेटम दिएको हो ।

माओवादी केन्द्र पार्टी परित्याग गरी प्रधानमन्त्री केपी शर्मा ओली समूहको एमाले प्रवेश गरेपछि आङ्बुहाङ आर्थिक मामिला तथा योजनामन्त्रीमा नियुक्त भएका छन् । उनी यसअघि माओवादी केन्द्रका संसदीय दलका नेता थिए ।

‘दलको बैठकले पार्टी परित्याग गरेका आङ्बुहाङलाई दलको नेतादेखि हटाएर २४ घण्टाभित्र स्पष्टीकरण पेस गर्न निर्देशन दिएको छ’, माओवादी केन्द्रका प्रदेश १ का नवनियुक्त संसदीय दलका नेता इन्द्रबहादुर आङबोले भने, ‘दल त्याग गरेको हो वा होइन भन्ने विषयमा दलको बैठकले स्पष्टीकरण सोधिएको छ । उहाँले २४ घण्टाभित्र स्पष्टीकरण दिएपछि अन्य कारबाहीको प्रक्रिया अगाडि बढ्छ ।’

यसैबीच संसदीय दलको उपनेतामा रामकुमार राई र प्रमुख सचेतकमा झलकसिंह दर्लामी तथा सचेतकमा सौभाग्यवतीदेवी राई चयन भएका छन् ।

छुटाउनुभयो कि?

सम्पूर्ण