बर्दिवासमा प्रहरीको गोली लागि ज्यान गुमाएका न्यौपानेलाई शहीद घोषणा गर्न स्थानीयको माग

0SHARES

१० मंसिर २०७७ नेपाल टाईम्स

१० मंसिर, महोत्तरी । बर्दिवासमा प्रहरीको गोली लागेर ज्यान गुमाएका सञ्जय भनिने बुद्धिराज न्यौपानेलाई शहीद घोषणा गर्न स्थानीयले माग गरेका छन् ।

बुधबार बिहान बर्दिवास सेवा समितिले आयोजना गरेको सर्वपक्षीय बैठकमा समितिका सदस्यसमेत रहेका न्यौपानेलाई सरकारले शहीद घोषणा गर्नुपर्ने माग अगाडि बढाइएको हो ।

त्यस्तै बैठकले आन्दोलनमा घाइते भएकाहरूको उपचार खर्च तथा क्षतिपूर्ति बेहोर्नुपर्ने, गोली चलाउन निर्देशन दिनेलाई निलम्बन गरी बर्खास्त गर्नुपर्ने, बालिकाको हत्यारालाई कानुनअनुसारको कारबाहीको लागि माग अगाडि सारेको हो ।

ती माग सरकारसम्म पु¥याउनका लागि कांग्रेस नेता चीरञ्जीवी हमालको संयोजकत्वमा ११ सदस्यीय वार्ता समितिसमेत गठन भएको समितका सदस्य हिरा गौतमले जानकारी दिए ।

प्रहरीको गोली लागेपछि घाइते भएका न्यौपानेको उपचारको क्रममा मङ्गलबार राति काठमाडौंमा ज्यान गएको थियो, उनको बुधबार नै पशुपति आर्यघाटमा दाहसंस्कार गर्ने परिवारले जनाएको छ ।

गएको आइतबारदेखि हराएकी महोत्तरीको बर्दिबास १४ की ६ वर्षीया बालिकाको शव बोराभित्र कोचिएको अवस्थामा खाली चौरमा सोमबार मध्यराति भेटिएको थियो ।

बालिका हत्याको आरोपमा प्रहरीले गौशाला नगरपालिका ५ का अरुण साहलाई नियन्त्रणमा लिइ थप अनुसन्धान गरिरहेको छ ।

घटनाको विरोधमा मङ्गलबार स्थानीय आन्दोलित भएका थिए । भिडलाई तितरवितर पार्न प्रहरीले चलाएको गोली ‘उछिट्टिएर’ लाग्दा तीन जना घाइते भएको महोत्तरीका प्रमुख जिल्ला अधिकारी कृष्णबहादुर कटुवालले बताए ।

विज्ञापन बक्स