बस्तीको बीचमा बंगुर पालन र कुखुरापालन गरेपछि ललितपुरे आन्दोलित

0SHARES

१८ आश्विन २०७७ नेपाल टाईम्स

१८ असोज, काठमाडौँ ।
ललितपुर महानगरपालिका वडा नं. १५ नयाँ वस्तीमा रहेको राष्ट्रिय पशुविज्ञान अनुसन्धान प्रतिष्ठानको कृषिफार्म हटाउन स्थानीयहरुले माग गरेका छन् । नयाँवस्तीका स्थानीयहरु स्थानीय वडा अध्यक्ष सहित प्रतिष्ठानको कार्यालयमा पुगेर बंगुर पालन र कुखुरापालन रहेको फार्म हाउस हटाउन माग गरेका हुन् ।

उनीहरुले फार्म हाउसका कारण स्थानीय वस्तीमा दुर्गन्ध फैलिएको र विभिन्न रोगको सिकार हुनु परेको भन्दै छिटो भन्दा छिटो फार्म हाउस हटाउन माग गरेका हुन् । वडा अध्यक्ष शुदर्शन मिश्रले फार्म हाउसको फोहोरको दुर्गन्धले स्थानीय वस्तीमा असर परेकोले फार्म हाउसलाई उपयुक्त ठाउँमा सार्न माग गरे ।

उनले स्थानीयहरुको माग जायज भएकाले कृषि अनुसन्धान परिषद् अन्तर्गतको प्रतिष्ठानले फार्म हाउस स्थानान्तरण गरी स्थानीयको समस्या सम्बोधन गर्नुपर्ने बताए । यस अघि पनि स्थानीय नागरिकले पटक पटक जानकारी गराउँदा समेत माग पुरा नभएकाले यसपटक अन्तिम पटक माग सहितको पत्र बुझाइएको र अब पनि माग सम्बोधन नभए सशक्त ढंगले संघर्ष गरिने बताए ।

स्थानीयले यस अघि पनि फार्म हाउस हटाउन माग गर्दै २०७४ असार ४ गते प्रतिष्ठानलाई पत्र बुझाएका थिए । हालसम्म आफुहरुका माग पुरा नहुँदा आन्दोलित हुनुपर्ने अवस्थामा पुगेको स्थानीयहरुले बताएका छन् । उनीहरुले नागरिकको आवाज नसुन्ने सरकारी कार्यालय आफुहरुका लागि आवस्यक नभएको समेत बताएका छन् ।

विज्ञापन बक्स