भारतबाट आउने यात्रुलाई न्युजिल्यान्ड प्रवेशमा रोक

535SHARES

२६ चैत्र, एजेन्सी ।
भारतमा कोरोना संक्रमण तीव्र बन्दै गएपछि न्युजिल्यान्डले भारतबाट आउने यात्रुको प्रवेशमा रोक लगाउने भएको छ ।

बिहीबार न्युजिल्यान्डमा थप २३ जनामा कोरोना पुष्टि भएपछि न्युजिल्यनान्डले यो कदम चालेको हो । संक्रमण पुष्टि भएका २३ जनामध्ये १७ जना भारतबाट आएका व्यक्ति थिए ।

न्युजिल्यान्डकी प्रधानमन्त्री जसिन्डा आर्डनका अनुसार कोरोना भाइरसको रोकथाम र नियन्त्रणका लागि झन्डै २ हप्ता भारतबाट आउने यात्रुको प्रवेशमा रोक लगाइनेछ ।

अप्रिल ११ तारिख दिउँसो ४ बजेदेखि अप्रिल २८ सम्म भारतबाट आउने यात्रुको प्रवेशमा रोक लगाइने समाचार संस्था रोयटर्सले जनाएको छ । यो अवधिमा भारतमा रहेका न्युजिल्यान्डका नागरिक पनि स्वदेश फर्कन पाउने छैनन् ।

न्युजिल्यान्डले आफ्नो सीमामा कोरोना भाइरस पूर्ण रुपमा नियन्त्रण गरेको दाबी गर्दै आएको छ । त्यस्तै ४० दिनदेखि न्युजिल्यान्डमा समुदायमा संक्रमण नदेखिएको पनि रोयटर्सले जनाएको छ ।

तर पछिल्लो समय मुलुकबाहिरबाटै संक्रमित भएर फर्किनेको संख्या बढेका बताइएको छ । भारतबाट आउनेहरुमध्ये अधिकांशमा संक्रमण पुष्टि भएको पनि समाचारमा जनाइएको छ ।

न्युजिल्यान्डले विश्वका अन्य मुलुकको तुलनामा कोरोना रोकथाम र नियन्त्रणमा प्रभावकारी कदम चालिरहेको छ । उसले परीक्षण, कन्ट्याक्ट ट्रेसिङ र उपचारमा विशेष ध्यान दिएको छ ।

न्युजिल्यान्डमा अहिलेसम्म २ हजार ५ सय ५५ जनामा कोरोना संक्रमण पुष्टि भएको छ भने २६ जनाको मृत्यु भएको छ ।

छुटाउनुभयो कि?

सम्पूर्ण