भारतमा अहिले पनि झण्डै ५० प्रतिशतले मास्क लगाउँदैनन्, ६४ प्रतिशतले मुख मात्रै छोप्छन्

148SHARES

८ जेठ, काठमाडौं ।

भारतमा अहिले पनि झण्डै ५० प्रतिशत मानिसले मास्क नलगाउने गरेको पाइएको छ ।

केन्द्रीय स्वास्थ्य मन्त्रालयले हिजो सार्वजनिक गरेको विवरण अनुसार एक अध्ययनले अझै पनि ५० प्रतिशत मानिसले मास्क नलगाउने गरेको देखाएको छ ।

यस्तै, मास्क लगाउने गरेकाहरूमध्ये पनि झण्डै ६४ प्रतिशतले मुख मात्रै छोप्ने तर नाक नछोप्ने गरेको पाइएको छ । १४ प्रतिशत नागरिकले मात्रै मास्कको सही उपयोग गरेका पाइएको छ ।

मास्कसहित स्वास्थय मापदण्डको सही प्रयोग नगर्दा जोखिम झनै बढ्दै गएको अध्ययनलाई उदृत गर्दै भारतीय सञ्चारमाध्यमले जनाएका छन् ।

भारतमा सङ्क्रमण बढ्दै गए पनि स्वास्थ्यका मापदण्ड पालना भने लापरबाही छ । राजधानी नयाँ दिल्लीमा आयोजित पत्रकार सम्मेलनमा स्वास्थ्य मन्त्रालयका सहसचिव लव अग्रवालले भने–’हालैको एक अध्ययनबाट झण्डै ५० प्रतिशत मानिसले मास्क नलगाउने गरेको पाइएको छ ।’

उनले मास्क लगाउने गरेकाहरूमध्ये पनि झण्डै ६४ प्रतिशतले नाक राम्ररी नछोप्ने गरेको पाइएको बताए । सहसचिव अग्रवालका अनुसार १९ राज्यमा भने ५० हजारभन्दा कम सक्रिय सङ्क्रमितहरु रहेका छन् ।

कर्नाटक, पश्चिम बङ्गाललगायतका केही राज्यहरुमा २५ प्रतिशतभन्दा बढीमा सङ्क्रमण नै देखिने गरेको उनले बताए ।

’कुनै एउटा व्यक्तिले दूरी कायम गरेन भने औसतमा एक महिनामा ४०६ जनालाई सङ्क्रमित गराउन सक्ने देखिएको छ,’ उनले भने । अध्ययनका आधारमा पनि उनले भौतिक दूरी कायम गर्न र मास्क लगाउन अति आवश्यक रहेकोमा जोड दिए ।

भारतमा कोरोना भाइरसका नयाँ बिरामीको सङ्ख्या घट्दै गए पनि कोरोना सङ्क्रमणका कारण मृत्यु हुनेको दैनिक सङ्ख्यामा कमी आउन सकेको छैन । भारतमा अझै पनि झण्डै ३० लाख जनामा सक्रिय सङ्क्रमण छ ।

भारतमा गएको २४ घण्टामा दुई लाख ५४ हजार ३ सय ९५ जना नयाँ सङ्क्रमित थपिएका छन् भने चार हजारभन्दा धेरैको ज्यान गएको छ ।

छुटाउनुभयो कि?

सम्पूर्ण