राजदूत सिफारिसमा बाहिर देखिएको असन्तुष्टि नेकपा सचिवालयमा देखिएन

0SHARES

२० आश्विन २०७७ नेपाल टाईम्स

२० असोज, काठमाडौँ ।
सत्तारुढ दल नेपाल कम्युनिष्ट पार्टी (नेकपा) को सचिवालय बैठकमा संवैधानिकनियुक्ति र राजनीतिक नियुक्तिका विषयमा छलफल भएको छ ।  पछिल्लो पटक प्रधानमन्त्री केपी शर्मा ओलीले एकलौटी ढंगबाट राजदूत नियुक्त गरेपछि नेकपाका नेताहरु असन्तुष्ट थिए । प्रधानमन्त्री ओलीले तीन देशका लागि एकलौटी ढंगबाट राजदूत नियुक्त गरेको आरोप नेताहरुले लगाएपनि सचिवालय बैठकमा भने सामान्य छलफल मात्रै भएको प्रवक्ता नारायणकाजी श्रेष्ठले बताए ।

राजदूत नियुक्तिका विषयमा सामान्य छलफल भएपनि त्यस्ता निर्णयहरु गर्दा सरकारलाई सुझाव दिने विषयमा अर्को बैठकमा छलफल हुने उनले बताए । मन्त्रिपरिषद हेरफेरको विषयमा मंगलबार कुनै पनि छलफल नभएको उनले बताए । यसअघि बसेको सचिवालय बैठकले सैद्धान्तिक र नीतिगत रुपमा छलफल गरेपनि अध्यक्षद्वय ओली र पुष्पकमल दाहालको गृहकार्य जारी रहेकाले मंगलबार कुनै छलफल नभएको उनले बताए ।

बैठकले डा. गोविन्द केसीलाई अनसन तोड्न आग्रह गरेको छ । चिकित्सा शिक्षा सुधारको मागगर्दै १९ औं अनसन बसेका केसीको अधिकांश माग पूरा भएको र केही पूरा हुने क्रममा रहेकाले अनसन तोड्न नेकपा सचिवालयले आग्रह गरेको हो । अहिले कोरोनाले देशलाई अफ्ठ्यारो पारेको अवस्थामा कोरोना नियन्त्रण र रोकथाममा सम्पूर्ण ध्यान केन्द्रित हुनुपर्ने भएकाले छलफल गर्नुपर्न अन्य विषयमा छलफल गर्न सकिने उनले बताए । सांगठनिक एकीकरणको विषयमा पनि अध्यक्षद्वयबीच गृहकार्य जारी रहेको उनले बताए ।

विज्ञापन बक्स