राष्ट्रियसभा निर्वाचनमा प्रदेश ५ मा ११ लाख खर्च

0SHARES

२ फाल्गुन २०७४ नेपाल टाईम्स

घोराही : राष्ट्रियसभा सदस्य निर्वाचनका लागि प्रदेश नम्बर ५ मा झण्डै ११ लाख खर्च भएको छ। राष्ट्रियसभा निर्वाचन अधिकृत हेमन्त रावलले निर्वाचनका लागि ११ लाख ९८ हजार ९ सय ४० रुपैयाँ निर्वाचन खर्च आयोगबाट प्राप्त भएकोमा १० लाख ७१ हजार ६ सय ८८ रुपैयाँ खर्च भएको जानकारी दिए ।

निर्वाचन अधिकृतको कार्यालयमा ११ जना कर्मचारी, दुई वटा निर्वाचन केन्द्रमा १८ जना कर्मचारीको पारिश्रमिक र अन्य सामग्रीहरुको खरिदमा उक्त रकम खर्च भएको रावलले जानकरी दिए । उनले बचत भएको १ लाख २७ हजार २ सय ५३ रुपैयाँ आयोगमा फिर्ता पठाइएको बताए ।

यसैबीच राष्ट्रियसभा निर्वाचनको कार्यालय बुधबार बन्द गरिएको छ । दाङ देउखुरी जिल्ला अदालतमा स्थापना गरिएको निर्वाचन अधिकृतको कार्यालयलाई तोकिएको जिम्मेवारी पूरा गरेपछि बन्द गरिएको हो ।

मुख्य निर्वाचन अधिकृत हेमन्त रावलको अध्यक्षतामा तथा नागरिक समाज दाङका संयोजक चन्द्रराज पन्तको प्रमुख आतिथ्यतामा कार्यालयको बोर्ड निकालेर बन्द गरिएको हो ।

निर्वाचन अधिकृत रावलले निर्वाचन आयोगको जिम्मेवारी अनुसार निर्वाचन भएको एक साताभित्र जिम्मेवारी सकिएको घोषणा गर्नुपर्ने अनुसार पुस २९ गते स्थापना गरिएको कार्यालय बन्द गरिएको जानकारी दिए ।

गएको माघ २४ गते राष्ट्रियसभा सदस्यको निर्वाचन भएपछि २५ गते नै मुख्य निर्वाचन अधिकृतको कार्यालयले निर्वाचित ८ जनालाई प्रमाणपत्र प्रदान गरेको थियो ।

विज्ञापन बक्स