रूपन्देहीमा जारी आन्दोलनलाई हिंसात्मक नबनाउन मानव अधिकार आयोगको आग्रह

0SHARES

१९ आश्विन २०७७ नेपाल टाईम्स

१९ असोज, काठमाडौं । रूपन्देहीमा जारी विरोधका कार्यक्रमहरूलाई हिंसात्मक नबनाउन राष्ट्रिय मानव अधिकार आयोगले आग्रह गरेको छ ।

आयोगले सोमबार विज्ञप्ति जारी गर्दै विरोध कार्यक्रमहरू हिंसात्मक नबनाई संयमित र शान्तिपूर्ण रूपमा अगाडि बढाउन आग्रह गरेको हो ।

आफ्ना असहमतिका विषयहरूको वार्ता र संवादको माध्यमबाटै समाधान खोज्न आयोगले आन्दोलनरत पक्षलाई आग्रह गरेको छ।

साथै, शान्तिपूर्ण रूपमा विरोध प्रदर्शनमा उत्रिएका नागरिकहरूमाथि मर्यादित र संयमित व्यवहार गर्न पनि आयोगले स्थानीय प्रशासनको ध्यानाकर्षण गराएको आयोगका प्रवक्ता तथा सचिव वेद भट्टराईले जानकारी दिए।

गत शुक्रबार प्रदेश नम्बर ५ सरकारले प्रदेशको राजधानी दाङको देउखुरीलाई बनाउने प्रस्ताव गरेको थियो। त्यसकै विरोधमा रुपन्देहीमा आन्दोलनकर्ताले बन्द, हड्ताल तथा प्रदर्शन गरेका थिए।

त्यही क्रममा आन्दोलनरत पक्षले सरकारी सवारी साधनहरूमाथि तोडफोड तथा आगजनी गरेको थियो।

यस सम्बन्धमा आयोगको प्रदेश कार्यालय बुटवलले अनुगमन गरिरहेको आयोगले जनाएको छ।

त्यहाँको बन्दका कारण रुपन्देही र आसपासका जिल्लाहरूमा बिरामी, वृद्ध, गर्भवती महिला, श्रमिकलगायतलाई आवागमन तथा दैनिक जीवनमा कठिनाइ उत्पन्न भएको आयोगको अनुगमन टोलीले जनाएको छ।

विज्ञापन बक्स