रौतहट नरसंहारः आरोपित पूर्वसांसद आलमका एक सहयोगी पक्राउ

0SHARES

१८ असार २०७७ नेपाल टाईम्स

१८ असार, रौतहट । रौतहटको राजपुर इट्टाभट्टा हत्याकाण्डमा संलग्न थप एक जना पक्राउ परेका छन् ।

उक्त घटनामा संलग्न आरोपित पूर्व सांसद मोहम्मद अफताब आलमका सहयोगी राजपुर नगरपालिका वडा नम्बर ६ का ३४ वर्षीय शेष सरोज भनिने शेषसेराजलाई पक्राउ गरिएको प्रदेश प्रहरी कार्यालय प्रदेश नम्बर दुईका डिआईजी धिरजप्रताप सिंहले जानकारी दिएका छन्।

प्रदेश प्रहरी कार्यालयबाट खटिएको प्रहरी टोलीले आरोपित शेषसेराजलाई आज बारा जिल्लाको सिमावर्ती क्षेत्र सिम्रौनगढ नगरपालिका वडा नम्बर ८ बाट पक्राउ गरिएको डिआइजी सिंहले बताए।

नेपाली कांग्रेसका तत्कालीन सांसद आलमका सहयोगीहरुले उनकै निर्देशनमा २०६४ सालमा संविधानसभाको निर्वाचनका बेला धाँधली गर्न रौतहटको राजपुरमा बम बनाउने क्रममा विस्फोट भएको थियो। विस्फोटपछि त्यहाँ कार्यरत व्यक्तिहरु हताहत भएका थिए।

उक्त घटनामा मृत्यु भएका र घाइते भएकालाई बोरामा राखी इँटाभट्टामा लगेर जलाइएको थियो।

प्रहरीले २०६४ सालको संविधान सभा निर्वाचनको एकदिन पहिले भएको घटनाबारे अनुसन्धान गर्दै जाँदा पूर्व सांसद आलम दोषी पाइएपछि उनलाई गत वर्ष पक्राउ गरेको थियो।

उक्त हत्याकाण्डमा संलग्न भएको आरोपमा आलमसहित ११ जनाविरुद्ध मुद्दा दर्ता भएको थियो। जसमध्ये ८ जना आरोपित अझै फरार छन् ।

Facebook Comments

विज्ञापन बक्स