वामदेव गौतमको प्रस्ताव : २०७५ जेठ ३ पूर्व कायम स्थायी कमिटी बैठक बोलाएर तत्काल छलफल गरौँ

134SHARES

२६ जेठ, काठमाडौं ।

नेकपा एमालेका उपाध्यक्ष वामदेव गौतमले २०७५ को जेठ ३ पूर्व कायम रहेको स्थायी कमिटी बैठक बोलाएर तत्काल छलफल गर्न प्रस्ताव गरेका छन् ।

जतिसक्दो छिटो २०७५ को जेठ ३ पूर्व कायम रहेको अथवा माओवादी केन्द्रसँग पार्टी एकता हुनुभन्दा पहिले कायम रहेको स्थायी कमिटी बैठक बोलाएर पार्टीभित्र उत्पन्न समस्याबारे छलफल गरेर सही मार्ग दर्शन गर्नुपर्ने उनको भनाइ छ ।

नेकपा एमाले एकता अभियान समितिको बैठकपछि गौतमले विज्ञप्ति निकालेर जेठ ३ पूर्वको संरचनामा रहेको एमालेका दुई वरिष्ठ नेता, ४ उपाध्यक्ष, एक महासचिव, २ उप–महासचिव र ५ सचिवसहितको स्थायी कमिटी बैठक बोलाएर मध्यमार्गी बाटो खोज्नुपर्ने प्रस्ताव अघि सारेका हुन् ।

यस्तै नेता गौतमले अध्यक्ष केपी शर्मा ओलीले पार्टी एकताका लागि इमानदार प्रयत्न नगरेको समेत बताएका छन् । अध्यक्ष ओलीले एकता आह्वान गर्दै निकालेको विज्ञप्तिमा आफ्नै प्रशंसा गर्दै कुटिल चातुर्य र जालझेलको भाषा शैली प्रयोग गरेको गौतमको आरोप छ ।

ओलीको पार्टीलाई २०७५ को जेठ ३ पूर्वको संरचनामा पुर्याउने कुरा सकारात्मक भएको भए पनि जनवर्गीय संगठनको संरचना मूलभूत रुपमा भन्ने शब्दको अर्थ पहिलेको अवस्थामा जस्ताको त्यस्तै राख्न अस्वीकार पनि गर्न सकिन्छ भनेर बुझ्न सकिने उनको भनाइ छ ।

यस्तै गौतमले खनाल–नेपाल समूहका नेताहरुले संविधानको धारा ७६ को ५ अनुसार नेपाली कांग्रेसका सभापति शेरबहादुर देउवालाई प्रधानमन्त्री बनाउन हस्ताक्षर गर्ने र सर्वोच्च अदालत पुगेर हस्ताक्षर पेश गर्नु पनि प्रधानमन्त्री एवम् पार्टी अध्यक्ष ओलीकै अनेकौं विवादित क्रियाकलापको परिणाम रहेको आरोप लगाएका छन् ।

यस्तै सर्वोच्च अदालतको संवैधानिक इजलासले विघटित प्रतिनिधिसभा पुनःस्थापना अथवा प्रधानमन्त्रीको कदमलाई सदर गरेको अवस्थामा चुनावमा जान परेमा दुवै अवस्थाका चुनौतीलाई सामना गर्न एकतावद्ध एमाले तयार छ भन्ने सन्देश दिने छलाङ लगाएर अघि बढ्नुपर्ने नेता गौतमको भनाइ छ ।

छुटाउनुभयो कि?

सम्पूर्ण