विराटनगरको ऐतिहासिक रथयात्राको ५१ औं संस्करण सम्पन्न,५ लाख बढी श्रद्धालु र दर्शनार्थीहरुको रथायात्रामा सहभागिता

0SHARES

१९ भाद्र २०७५ नेपाल टाईम्स

विराटनगर,भदौ १९
विराटनगरको ५१ औं संस्करणको ऐतिहासिक रथयात्रा सम्पन्न भएको छ । विगतका बर्षहरुभन्दा यसपटकको रथयात्रामा उल्लेख्य श्रद्धालुले सहभागिता जनाएका छन् । प्रदेश एकका मुख्यमन्त्री शेरधन राईले पुजापाठपछि बेलुन उडाएर रथयात्राको शुभारम्भ भएको थियो ।

सोमबार अपरान्ह ४ बजे विराटनगर १ स्थित श्रीराधाकृष्ण मन्दिरबाट निस्किएको रथ झण्डै ७ किलोमिटरको परिक्रमा पछि फेरी मन्दिर परिसरमा पुगेर समापन भएको हो । रथयात्राको उदघाटनका अवसरमा प्रदेश एकका सामाजिक विकास मन्त्री जीवन घिमिरे,बनमन्त्री जगदीश कुशियैत,विराटनगर महानगरपालिकाका प्रमुख भीम पराजुली लगायतको सहभागिता थियो ।

रथयात्रामा यसपटक विभिन्न जातिय समुदाय र भजन मण्डली समेत गरेर ६८ वटा झाँकी आयोजकहरुले सहभागिता जनाएका छन । सो अवसरमा मुख्यमन्त्री राईले जातिय, सांस्कृतिक तथा धार्मिक विविधता देश र प्रदेशको सम्पति भएको उल्लेख गदै त्यसलाई जोगाउनुपर्ने उल्लेख गरे ।

गएकोबर्ष बाढीका कारण अस्तब्यस्त भएका कारण आयोजकको अपेक्षाभन्दा कम सहभागिता रहेपनि यसबर्ष ५ लाख बढी श्रद्धालु र दर्शनार्थीहरुले रथायात्रामा सहभागिता जनाएको आयोजकले जनाएको छ । रथयात्रामा भीडभाड बढी हुने भएपछि यसपटक ड्रोन क्यामराबाट रथ हिड्ने मार्गमा सुरक्षा निगरानी गरिएको थियो ।

विज्ञापन बक्स