विराटनगरको न्यूरो अस्पतालले सञ्चालन गर्याे कोभिड अस्पताल

0SHARES

१२ भाद्र २०७७ नेपाल टाईम्स

१२ भदौ, विराटनगर ।
विराटनगर–९ महेन्द्र चौकमा रहेको न्यूरो–कार्डियो एण्ड मल्टिस्पेसियालिटी अस्पतालको शाखा मदर एण्ड चाइल्ड अस्पताललाई कोभिड अस्पतालमा रुपान्तरण गरिएको छ । सो अस्पतालमा बिहीबारदेखि भेन्टिलेटरसहितको कोभिड अस्पताल सञ्चालनमा ल्याइएको हो । कोभिड अस्पतालमा जनरलका ४२, आईसीयूका ७ र भेन्टिलेटरका २ शैया रहेका छन् ।

कोभिड अस्पतालको उद्घाटन गर्दै प्रदेश १ का सामाजिक विकास मन्त्री जीवन घिमिरेले निजी क्षेत्रबाट कोभिड–१९ संक्रमितको उपचार सुरु भएसँगै थप सहज हुने विश्वास व्यक्त गरे ।

न्यूरो अस्पतालका अपरेशन डाइरेक्टर राजेश भट्टराईले कोरोना संक्रमितको संख्या बढ्दै गएकोले लक्षणसहितका संक्रमितहरुले उपचार अभावमा छटपटाई राख्नुपर्ने अवस्थाको अन्त्य गर्नका लागि अस्पताल सञ्चालनमा ल्याउनु परेको बताए ।

न्यूरोको कोभिड अस्पताल विहीबारदेखि नै विरामी भर्ना गरेर उपचार गर्न चाहनेका लागि खुल्ला भएको छ । अस्पतालमा पीसीआर परीक्षण ल्याब, कोभिड उपचार प्याकेज र प्रिमियम प्याकेजको समेत सुविधा रहेको छ ।

रकम बुझाएरै कोरोना संक्रमितको उपचार गराउनेको संख्यालाई मध्यनजर गर्दै विराटनगरमा यो दोस्रो अस्पताल सञ्चालनमा आएको हो । यसअघि विराट मेडिकल कलेज एण्ड टिचिङ अस्पतालले आईसोलेशन सञ्चालनमा ल्याएको थियो ।

विज्ञापन बक्स