विराटनगरमा यही महिना रेल आउने

0SHARES

१९ आश्विन २०७५ नेपाल टाईम्स

विराटनगर,असोज १९

भारतको बथनाहादेखि विराटनगर–१८ स्थित बुधनगरसम्मको ८ किलोमिटर क्षेत्रमा यही महिना भित्र रेल आउने भएको छ । रेल ल्याउनका लागि आवश्यक पूर्वधारको काम ९५ प्रतिशत पूरा भएकाले परीक्षण स्वरुप बुधनगरसम्म रेल ल्याउने तयारी गरिएको हो ।

भारतीय निर्माण कम्पनी इर्कनले बथनाहा कटहरी रेल्वे परियोजना निर्माणको काम अन्तिम चरणमा पुगेकाले यी महिनामा रेल ल्याउने तयारी अनुसार काम भईरहेको कम्पनीका जेनेरल मेनेजर प्रदीपकुमारले दिएको जानकारी दिए ।

अहिले भारतको बथनाहादेखि बुधनगरसम्मको ८ किलोमिटर क्षेत्रमा पनि लिक बिछ्याउने काम सम्पन्न भएको छ । जसमा भारत तर्फ ५ किलोमिटर र नेपाल तर्फ ३ किलोमिटर क्षेत्र रहेको छ ।

भारतीय रुपैयाँ ३ सय ७३ करोडको लागतमा निर्माण भइरहेको उक्त परियोजनामा हालसम्म २ सय ३५ करोड बजेट खर्च भइसकेको निर्माण कम्पनीले जनाएको छ ।

भारतको बथनाहादेखि नेपालको कटहरीसम्म १८ दशमलव ६ किलोमिटर रहेको छ । प्रदीपकुमारले आउँदो अक्टोबर मसान्तसम्ममा बुधनगरसम्म परीक्षणका लागि रेल ल्याउने तयारी भएको बताए ।

नेपाल रेल बिभागका प्रमुख बलराम मिश्र,भारतको रेल विभागका उच्च अधिकारीसहितको टोलीले कटहरी–बथनाहा रेलमार्गको आज अवलोकन गरी भई रहेको कामको बारेमा जानकारी लिएका हुन् ।

विज्ञापन बक्स