शान्ति सुरक्षा कायम गर्न मोरङ मुस्लिम समाजको माग

0SHARES

८ पुष २०७५ नेपाल टाईम्स

विराटनगर ,पुस ८
जनतालाई अनुभूति हुने गरी शान्तिसुरक्षाको ब्यबस्था मिलाउन माग गर्दै मोरङ मुस्लिम समाजले प्रदेश नम्बर १ का आन्तरिक मामिला तथा कानुन मन्त्री हिक्मत कार्कीलाई ज्ञापन पत्र बुझाएको छ । मुस्लिम समाजका पदाधिकारीहरुले आईतबार मन्त्रालयमै पुगेर मन्त्री कार्कीलाई ज्ञापन पत्र बुझाएका हुन् ।

पछिल्लो समय प्रदेश नम्बर एकमा दुईमहिनाभित्रै गोली हानी हत्या गरिएका दुई मुस्लिम अगुवाहरुको हत्यारा पत्ता लगाउन नसक्नु दु : खद भएको बताउँदै मुस्लिम समाजले दोषीलाई तुरुन्त कारबाहीको दायरामा ल्याउन माग गरेको छ ।

अहिले सम्म हत्यारा पक्राउ नपर्नु दुखद भएको बताउँदै मोरङ मुस्लिम समाजका प्रवक्ता वसिम आलमले यस्ता घटनाले भोलिका दिनमा ठूलो दुर्घटना निम्त्याउन सक्ने भएकाले सरकार गम्भीर हुन जरुरी रहेको बताए ।

अपराधीको कुनैपनि जात नहुने भएकाले मस्जित,मठ, मन्दिर, गुम्बा, चर्च अथवा अरु कुनै धार्मिकस्थल तथा धार्मिक गुरुहरु माथि भएका आक्रमणका दोषीलाई तुरुन्त कारबाहीको दायरामा ल्याउनु पर्ने मुस्लिम समाजको माग छ ।

ज्ञापन पत्र बुझ्दै मन्त्री कार्कीले यस्ता घटनाहरुप्रति सरकार गम्भीर भएको बताए । उनले पछिल्लो समय भएका घटनाको मध्यनजर गर्दै झापा, मोरङ र सुनसरीमा सुरक्षा संवेदनशिलतालाई ध्यान राख्न प्रहरी प्रशासनलाई निर्देशन समेत दिएको बताए ।

उनले चाँडै  यस्ता घटनाका कारण पत्ता लगाई नियन्त्रण गर्ने बताउँदै सबैलाई सहयोगको लागि आग्रह गरे ।

विज्ञापन बक्स