शिक्षक हत्या प्रकरणः पक्राउ परेका विप्लवका जिल्ला इञ्चार्ज सिलवाल कारागार चलान

0SHARES

११ फाल्गुन २०७७ नेपाल टाईम्स

११ फागुन, विराटनगर । मोरङको मिक्लाजुङ गाउँपालिकाका शिक्षक राजेन्द्र श्रेष्ठको हत्या आरोपमा पक्राउ परेका ३२ वर्षीय नेत्रविक्रम चन्द विप्लवका जिल्ला इञ्चार्ज डिबी सिलवाल भनिने धनबहादुर विक जिल्ला अदालत मोरङको आदेशपछि पुर्पक्षका लागि कारागार चलान भएका छन् ।

शिक्षक हत्या प्रकरणमा फरार प्रतिवादीको सूचीमा विप्लव समूहका महासचिव विप्लव पनि छन् । शिक्षक श्रेष्ठको हत्या आरोपमा पक्राउ परेका विकलाई न्यायाधीश कपिलमणि गौतमको इजलासले सोमबार थुनामा राख्न आदेश दिएको थियो ।

प्रहरीले माघ ७ गते विकलाई मोरङको बूढीगंगाबाट हतियारसहित पक्राउ गरेको थियो । को २४ प ४००५ नम्बरको मोटरसाइकलमा सवार रहेका उनको साथबाट हातहतियार बरामद भएपछि खरखजाना, अपहरण र कर्तव्य ज्यान मुद्दा चलाइएको थियो । हातहतियार खरखजाना मुद्दामा न्यायाधीश दुर्गा खड्काको इजलासले यसअघि नै उनलाई थुनामा राख्न आदेश दिएको थियो । दोस्रो मुद्दामा पनि थुनामै राख्ने आदेश भएको हो ।

शिक्षक हत्या प्रकरणमा ४२ जनाको संलग्नता रहेको अनुसन्धानबाट खुलेको थियो । तीमध्ये ३५ जनालाई प्रतिवादी बनाएर मुद्दा दर्ता भएको थियो ।

विप्लव समूहले सुराकीको आरोप लगाउँदै घरबाटै नियन्त्रणमा लिएर अपहरणपछि शिक्षक श्रेष्ठको गत मंसिर २३ गते हत्या गरेको थियो । घटना भएकै दिन विप्लव समूहका मेची–कोसी ब्यूरो इञ्चार्ज प्रतापले विज्ञप्ति जारी गरेर हत्याको जिम्मा लिएका थिए ।

पछिल्लो समय नेत्रविक्रम चन्दले शान्तिपूर्ण राजनीतिमा आउनका लागि सरकारसँग वार्ता गर्न तयार रहेको विज्ञप्ति जारी गरेका थिए । सरकारसँग वार्ता गर्न तयार रहेको बताएका विप्लवसहित ३४ जना अपहरण र हत्याको घटनाका फरार प्रतिवादी हुन् ।

विज्ञापन बक्स