संक्रमितका लागि तत्काल औषधि र अक्सिजन व्यवस्था गर : सर्वोच्च

109SHARES

२९ बैशाख, काठमाडौं । सर्वोच्च अदालतले आवश्यक औषधि तथा अक्सिजन आपूर्ति सहज व्यवस्था गर्न सरकारका नाममा अन्तरिम आदेश दिएको छ ।

न्यायाधीश बमकुमार श्रेष्ठको एकल इजलासले मंगलबार आदेश जारी गर्दै संक्रमित उपचारका लागि आवश्यक औषधि, अक्सिजन आपूर्ति सहज बनाउन आदेश जारी गरेको हो ।

अधिवक्ता शैलेन्द्रप्रसाद अम्बेडकरद्वारा दायर निवेदनमा सुनुवाइ गर्दै सर्वोच्चले दिनदिनै संक्रमित बढ्दै गइरहेको भन्दै आदेश जारी गरेको हो ।

सर्वोच्चले अन्तरिम आदेशमा ‘संक्रमितको दिनदिनै बढ्दै गइरहेको संख्या मध्यनजर गर्दै उपचारमा कसैले विमुख नहुन नपरोस् भन्नका लागि थप साधनयुक्त अस्पताल सञ्चालन गराउनेतर्फ आवश्यक पहल गर्नू’ भनिएको छ ।

‘अक्सिजनको सहज आपूर्ति तत्काल गर्न र नागरिकको जीवनसँग प्रत्यक्ष सम्बन्ध राख्ने यी कुरालाई सम्बन्धित सरोकारवालाको प्रतिनिधित्वसमेत हुनेगरी एउटा कार्य समितिको निर्माण गरी समास्याको समाधान प्रभावकारी रूपमा गर्नु गराउनू,’ आदेशमा भनिएको छ ।

अन्तरिम आदेशमा सर्वोच्चले विपक्षी बनाइएको स्वास्थ्य मन्त्रालयलाई लिखित जवाफ पठाउन आदेश जारी गर्दै कोरोना संक्रमणसँग जोडिएका विषयवस्तु र गम्भीर्यतासमेत ध्यानमा राखी विवाद निरुपण चाँडै टुंगो लगाउनुपर्ने भन्दै अर्को सुनुवाइ ९ जेठमा हुने उल्लेख छ ।

छुटाउनुभयो कि?

सम्पूर्ण