सङ्क्रमितको उपचारमा रोबर्ट

0SHARES

२५ कार्तिक २०७७ नेपाल टाईम्स

भक्तपुर : मध्यपुर थिमि नगरपालिकाले नगरपालिकाद्वारा सञ्चालित नेपाल कोरियामैत्री नगरपालिका अस्पतालमा कोरोना भाइरस सङ्क्रमितको उपचारमा नर्सिङ रोबर्ट प्रयोग गर्दै आएको छ । अस्पतालमा उपचारार्थ कोरोना सङ्क्रमितका लागि नर्सिङ रोबर्ट सारथि बन्नुका साथै यसको प्रयोगले अस्पतालका स्वास्थ्यकर्मी लगायत अन्य व्यक्तिका लागि सहज भएको छ ।

कोरोना सङ्क्रमितसँग डाक्टर, नर्स लगायतका अन्य व्यक्तिको सम्पर्क कम होस् भन्नका लागि नगरपालिकाले नगर अस्पतालमा नर्सिङ रोबर्ट प्रयोगमा ल्याएको हो । अस्पतालले नर्सिङ रोबर्ट सञ्चालनमा ल्याएसँगै डाक्टर, नर्स र अस्पतालमा सेवा लिन आउने व्यक्तिले सुरक्षित महसुस गरेका छन् । सङ्क्रमितलाई आवश्यक पर्ने खाना, पानी, लत्ताकपडा, औषधि लगायतका वस्तु बाहिर ढोकैमा राख्ने र निर्देशन अनुसार रोबर्टले ढोकादेखि बिरामीको बेडसम्म पु¥याउने गरेको मध्यपुर थिमि नगरपालिकाले जनाएको छ ।

मध्यपुर थिमि नगरपालिकाका प्रमुख मदनसुन्दर श्रेष्ठले अस्पतालमा नर्सिङ रोबर्टको प्रयोगले सङ्क्रमितलाई सामान पु¥याउन र औषधि प्रयोग गर्न सहज भएको बताउनुभयो । रोबर्टमार्फत सेवा दिने यो नेपालकै पहिलो अस्पताल भएको दाबी गरिएको छ । उहाँले भन्नुभयो, “नेपालकै इन्जिनियरले बनाएको नर्सिङ रोबर्टको प्रयोगले अस्पतालमा स्वास्थ्यकर्मीलाई सहयोग पुगेको छ, रोबर्टको प्रयोगले सङ्क्रमितको उपचारमा सारथि बन्दै गएको छ ।” आगामी दिनमा रोबर्टको प्रयोगलाई थप प्रभावकारी बनाउने अस्पतालले तयारी गरेको छ ।

नेपालका युवाले निर्माण गरेको तीनवटा रोबर्टकालागि करिब १५ लाख रुपियाँ लागत परेको जनाइएको छ । नेपाल कोरियामैत्री नगरपालिका अस्पतालका प्रशासन शाखा प्रमुख रुपेश श्रेष्ठले रोबर्ट सञ्चालनमा ल्याइएपछि औषधि र खाना लगायतका सामग्री पु¥याउन सहज भएको बताउनुभयो । उहाँका अनुसार कोरोनाका सङ्क्रमितसँग डाक्टर, नर्सको प्रत्यक्ष सम्पर्क हुनबाट नर्सिङ रोबर्टले बचाएको छ । रोबर्ट सञ्चालनमा थप प्रभावकारी बनाउने गरी अस्पतालले काम गरिरहेको उहाँले बताउनुभयो ।

नगरपालिकाले कोरोना सङ्क्रमण रोकथाम र नियन्त्रणका लागि कन्ट्याक्ट ट्रेसिङलाई तीव्र पार्दै सङ्क्रमितलाई व्यवस्थापन गर्दै आएको छ । हामी जनप्रतिनिधिसहितको टोली सङ्क्रमित परिवारको घरघरमा पुगेर बाहिर बसेर उनीहरूको समस्या बुझ्ने, समस्या भए समाधान गर्ने तथा मनोपरामर्श दिएर हौसला प्रदान गर्दै आएको नगर प्रमुख श्रेष्ठले बताउनुभयो ।

नगरपालिकाले स्वास्थ्यकर्मी र सुरक्षाकर्मीको परीक्षणलाई उच्च प्राथमिकतामा राखेको छ । अस्पतालमा ८५ बाट एक सय बेड निर्माण गरेको, २४सैँ घण्टा सर्जरी र डायलसिस गर्नुका साथै नगरपालिका आफैँले पीसीआर मेसिन खरिद गरी कोरोना परीक्षण गर्दै आएको छ । त्यस्तै अस्पतालमा कोभिड अप्रेसन वार्ड बनाइएको छ । अस्पतालका कर्मचारीलाई गेस्ट हाउसमा अलगै आइसोलेसनमा राख्ने व्यवस्था गरिएको छ ।,यो समाचार आजको गोरखापत्र दैनिकमा छ ।

विज्ञापन बक्स