साग पुरुष फुटबलमा फाइनलमा पुग्न नेपाललाई बंगलादेशविरुद्ध जित या बाराबरीको विकल्प

0SHARES

२२ मंसिर २०७६ नेपाल टाईम्स

२२ मंसिर, काठमाडौं । बङ्गलादेशविरुद्धको खेलमा नेपालले हार टार्न सके जारी १३औँ दक्षिण एसियाली खेलकुद (साग)को स्वर्ण पदक दाबेदारका रुपमा फाइनलमा पुग्नेछ ।

यसअघि भएको खेलमा श्रीलङ्कासँग एक–एक गोलको बराबरीमा रोकिएपछि नेपालले फाइनल पुग्न बंगलादेशविरुद्ध जित या बराबरीमा रोकिनुपर्ने हुन्छ । यता बंगलादेशलाई भने फाइनल पुग्न जितको विकल्प छैन ।

त्रिपुरेश्वरको दशरथ रङ्गशालामा लिग चरणको अन्तिम खेलमा नेपाल र बंगलादेश प्रतिस्पर्धा गर्दैछन् । खेल साँझ ५ बजेपछि सुरु हुनेछ । भुटानविरुद्ध ४–० को जित निकालेको नेपालले श्रीलङ्कासँग दोस्रो खेल खेलेको थियो ।

खेलको निर्धारित समयसम्म १–० को अग्रता लिएको नेपालले अत्तिरिक्त समयलाई रोक्न नसक्दा खेल एक–एक गोलको बराबरीमा पुगेको थियो ।

त्यही नतिजाले गर्दा साग फुटबलको फाइनल प्रवेशका लागि नेपाललाई बंगलादेशसँग जीत या बराबरी आवश्यक छ । दशरथ रङ्गशालामा भरिभराउ दर्शकको साथ पाएको नेपाली टोलीले शनिबार माल्दिभ्सविरुद्ध २–१ को जीत हात पार्‍यो । जारी खेलमा नेपालसँग मात्रै पराजित भुटान चार खेलबाट ९ अङ्क जोड्दै फाइनल पुग्ने पहिलो टोली बनेको छ ।

त्यसैगरी नेपाल ७ अङ्क जोड्दै दोस्रो स्थानमा छ । यता बंगलादेशको ४ अङ्क रहेको छ । श्रीलङ्का र माल्दिभ्सको भने समान २र२ अङ्क रहेको छ ।

नेपाल र बंगलादेशबीचको विजेता टोलीले सागको स्वर्ण पदकका लागि भुटानसँग खेल्नेछ । सागको पुरुष फुटबलमा भारत र पाकिस्तान नखेल्ने भएपछि खेल राउन्ड रोविनमा सञ्चालन भएको हो ।

विज्ञापन बक्स