सिद्धबाबालाई १५ दिन भित्र झिकाउन उच्च अदालत विराटनगरको आदेश

627SHARES

१३ चैत, विराटनगर । आफ्नै अनुयायीमाथि बलात्कार आरोप मुद्दामा जिल्ला अदालत सुनसरीबाट सफाई पाएका धर्मगुरु सिद्धबाबा भनिने कृष्णबहादुर गिरीलाई उच्च अदालत विराटनगरले १५ दिन भित्र झिकाउन आदेश दिएको छ ।

शुक्रबार न्यायाधीस प्रेमराज ढकाल र रेणुका शाहको इजलासले सिद्धबाबालाई झिकाउने आदेश दिएको हो ।‘ दुई जना श्रीमानको इजलासबाट प्रतिवादीलाई १५ दिन भित्र झिकाउने आदेश भएको छ,’उच्च अदालत विराटनगरका सूचना अधिकारी ओम सुवेदीले भने, ‘अदालती भाषामा यसलाई झगडिया झिकाउने आदेश भनिन्छ ।’

जिल्ला अदालत सुनसरीले सिद्धबाबालाई सफाई दिएपछि उच्च सरकारी वकिलको कार्यालयले २८ फागुनमा उच्च अदालतमा पुनरावलोकन निवेदन दर्ता गराएको थियो ।शुक्रबार सिद्धबाबालाई झिकाउने आदेश भएको हो । सिद्धबाबाका नाममा शुक्रबार अदालतले म्याद जारी गर्ने अदालतको तयारी छ । उच्च अदालतमा हाजिर भएपछि बयान र प्रमण पून बुझ्ने प्रकृया हुनेछ । त्यसपछि मुद्दाको पेसी सुरु हुनेछ ।

गिरीलाई गत मंसिर २२ गते जिल्ला अदालत सुनसरीका न्यायाधीश अर्जुनप्रसाद कोइरालाको इजलासले सफाई दिएको थियो । प्रतिवादी पक्षको मात्रै बयानपछि जारी भएको फैसलामा महिलाको चरित्रमाथि प्रश्न उठाउँदै भनिएको छ, ‘जाहेरवाली र प्रतिवादी बीच आदान प्रदान भएका म्यासेजहरुबाट सहमतिमा शारिरीक सम्पर्क भएको भन्ने देखिएकोले अभियोग दावीबमोजिम जवरजस्ती करणीको कसूर कायम गर्न मिल्ने देखिएन ।’

विवादास्पद फैसला गर्ने न्यायाधीश अर्जुनप्रसाद कोइराला उच्च अदालतको न्यायाधीश नियुक्तीमा सिफारिसमा परेकै दिन गत फागुन २८ गते उच्चमा पुनरावेदन दर्ता भएको थियो ।

२०७६ कात्तिक ४ गते राती सिद्धबाबाले करणी गरेको भनि २०७६ मंसिर ११ गते सिद्धबाबाकी महिला अनुयायीले जाहेरी दिएकी थिइन् । अदालतले सफाई दिएपछि गिरी चतरा स्थीत आफ्नै आश्रममा छन् ।

छुटाउनुभयो कि?

सम्पूर्ण