हिमवत्खण्ड कला साहित्य सम्मिलन ः २०५ सदस्यीय मूल समिति

0SHARES

३० जेष्ठ २०७५ नेपाल टाईम्स

काठमाडौँ, जेठ ३०

दुई सय पाँचौँ भानुजयन्तीका अवसरमा मदन भण्डारी कला साहित्य प्रतिष्ठानको आयोजनामा काठमाडौँमा हुने ‘हिमवत्खण्ड कला साहित्य सम्मिलन’ का लागि प्रा डा राजेन्द्र सुवेदीका संयोजकत्वमा २०५ सदस्यीय मूल समिति गठन गरिएको छ ।

आगामी असार २९, ३० र ३१ गते हुने पहिलो सम्मिलनमा भानुभक्त आचार्यप्रतिको दृष्टिकोण, नेपालका भाषाको साहित्यिक अवस्था, सम्पर्क भाषाका रुपमा नेपाली भाषाको राष्ट्रिय अन्तर्राष्ट्रिय भूमिका तथा नेपाली भाषाको वर्तमान अवस्था र यसको महत्व विषयमा कार्यपत्रसहित छलफल हुने छ । सम्मिलनमा बहुभाषिक कविगोष्ठी र सांस्कृतिक कार्यक्रम पनि हुने छ । तीनदिने कार्यक्रमअन्तर्गत असार ३० गते चन्द्रागिरिमा साहित्य र कलासम्बन्धी कार्यशाला पनि हुनेछ ।

प्रतिष्ठानका अध्यक्ष सांसद डा विजय सुब्बाको अध्यक्षतामा बसेको बैठकले मूल समितिका सहसंयोजकमा प्रा डा बद्रीविशाल पोखरेल, सात प्रदेशका संयोजक, सदस्य सचिवमा डा देवी नेपाल, १५ सदस्यीय सचिवालय र कार्यालय सचिवमा जयन्ता पोखरेल रहने निर्णय गरेको छ । मूल समितिअन्तर्गत १५ भन्दा बढी उपसमिति पनि रहेका छन् । चन्द्रागिरिमा हुने कार्यक्रमको संयोजन भने दिनेश डिसीले गर्ने छन् ।

समारोहमा नेपालका सबै प्रदेश, भारत, म्यान्मा, भुटान तथा युरोप र अमेरिकाका नेपाली एवं नेपाली मातृभाषी विद्वान्, भाषाविद्, प्राध्यापक, साहित्यकार, कलाकार, राजनीतिकर्मी आदिको सहभागिता रहनेछ । प्रधानमन्त्री तथा प्रतिष्ठानका संरक्षक केपी शर्मा ओलीले मङ्गलबार आयोजक संस्थालाई नेपालका सबै भाषाभाषी र सबै विधा समेट्न निर्देशन दिइसकेका छन्।
रासस

 

विज्ञापन बक्स