१५ गतेदेखि सुपथ पसल, २१ गतेदेखि नयाँ नोट

0SHARES

१३ आश्विन २०७५ नेपाल टाईम्स

कठमाडौँ, असोज १३
दसैँ नजिकिएसँगै बजारमा चहलपहल बढेको छ । दसैँको लागि अग्रिम टिकट बुकिङ खुलेपछि सुपथ मूल्य पसल सञ्चालन गर्ने तयारी पनि भैरहेको छ । दसैँको बेला १० प्रतिशत गाडीभाडा बढाएको सरकारले खाद्यान्नमा भने छुट दिने बताएको छ ।

नेपाल खाद्य संस्थानले चाडपर्वलाई लक्षित गर्दै आउँदो १५ गतेदेखि सुपथ मूल्य पसल सञ्चालन गर्ने भएको छ । संस्थानको बैठकले १५ गतेदेखि मात्रै सुपथ मूल्य पसल खुलाउने निर्णय गरेको हो ।

चाडपर्वमा उपभोक्तालाई दैनिक उपभोग्य वस्तुमा राहत दिन असोज १५ गतेदेखि कात्तिक २७ गतेसम्म यस्तो पसल सञ्चालन गरिने निर्णय भएको संस्थानका सूचना अधिकारी शंकर सापकोटाले जानकारी दिए । संस्थानले आफ्नो शाखा रामशाहपथ, थापाथली र नख्खुबाट दैनिक उपभोग्य सामग्री बिक्री वितरण गर्नेछ ।

२१ गतेदेखि नयाँ नोट

नेपाल राष्ट्र बैंकले असोज २१ गतेदेखि नयाँ नोट साट्ने भएको छ । ५, १०, २० र ५० र एक सय दरका गरी प्रतिव्यक्ति २७ हजार रुपैयाँसम्म नोट साटिदिने राष्ट्र बैंकले जनाएको छ । बैंक तथा वित्तीय संस्थालाई भने राष्ट्र बैंकले बिहीबारदेखि नयाँ नोट वितरण सुरु गरीसकेको छ । बैंक तथा वित्तीय संस्थालाई पहिले नयाँ नोट दिए पनि ती संस्थाले पनि २१ गतेदेखि मात्र सर्वसाधारणलाई वितरण सुरु गर्नेछन् ।

असोज २१ देखि २९ गतेसम्म ५, १०, २० र ५० का दुई, दुई तथा १ सय दरका एक पाकेट सटही गर्न पाउने राष्ट्र बैंकले जनाएको छ । राष्ट्र बैंकले आफूलाई पायक पर्ने नजिकको बैंकबाट सटही गर्न अनुरोध पनि छ ।

काठमाडौं बाहिर राष्ट्र बैंकका विराटनगर, जनकपुर, वीरगन्ज, पोखरा, सिद्धार्थनगर, नेपालगन्ज र धनगढीस्थित क्षेत्रीय कार्यालयहरूबाट तथा राष्ट्र बैंकबाट नोट कोष सुविधा लिएका सरकारी स्वामित्वका बैंकहरूको शाखाबाट नयाँ नोट साट्न सकिने राष्ट्र बैंकले जनाएको छ ।

विज्ञापन बक्स