५० प्रतिशत मात्र यात्रु राख्नुपर्ने भएपछि निजी वायुसेवाले उडान नगर्ने

0SHARES

३१ भाद्र २०७७ नेपाल टाईम्स

३१ भदौ, काठमाडौं ।
सरकारले आन्तरिक उडानमा सिट क्षमताको ५० प्रतिशत मात्रै यात्रु राखेर उडान गर्नुपर्ने नियम बनाएपछि वायुसेवा सञ्चालकहरुले असहमती जनाएका छन् । वायुसेवा सञ्चालकहरुले ५० प्रतिशत मात्र यात्रु राखेर उडान गर्न असमर्थ रहेको बताएका हुन् ।

आन्तरिक वायुसेवा सञ्चालक संघमा आबद्ध निजी वायुसेवाले बुधबार संस्कृति, पर्यटन तथा नागरिक उड्डयन मन्त्री योगेश भट्टराई र पर्यटन सचिव केदारबहादुर अधिकारी र नागरिक उड्डयन प्राधिकरणलाई पत्र पठाउँदै ६ महिनादेखि बन्द वायुसेवा उद्योगले ५० प्रतिशतमात्रै यात्रु राखेर उडान सञ्चालन गर्न नसक्ने जनाउँदै यो व्यवस्था खारेज भएमा मात्रै सेवा सुचारु गर्ने भनेका छन् ।

संघका प्रथम उपाध्यक्ष अनोज रिमालले छिमेकी मुलुक भारत लगायत विश्वका अन्य मुलुकमा सामाजिक दूरी राखेर सिट क्षमताको ५० प्रतिशतमात्रै यात्रु बोक्ने नियम नभएकाले आफूहरुले सरकारको यो व्यवस्था नमान्ने बताए ।

मन्त्रालयले भने यसअघि तोकिएको सबैभन्दा माथिल्लो दरमा भाडा लिन पाउने गरी सहमति गर्न प्रस्ताव गरेको छ । तर, व्यवसायी भने भर्खरै महामारीका कारण घरभित्रै थुनिएर बसेका यात्रुले मँहगो भाडा तिरेर यात्रा गर्न नसक्ने भन्दै असहमति जनाएका हुन् ।

सोमबारको मन्त्रिपरिषद् बैठकले सिट क्षमताको ५० प्रतिशतमात्रै यात्रु राखेर असोज १ गते (बिहीबार) देखि आन्तरिक उडान सुचारु गर्ने निर्णय गरेको थियो ।

विज्ञापन बक्स