१७ पुस, काठमाडौं ।
सामाजिक सञ्जाल इन्स्टाग्राम र वाट्स्एपको माध्यमबाट साथी बनाई १३ लाख ३९ हजार रुपैयाँ ठगी गरेको अभियोगमा २ जनालाई बुधबार प्रहरीले पक्राउ गरेको छ ।
पक्राउ पर्नेहरूमा रुपन्देही मर्चबारी गाँउपालिका–४ बस्ने २९ वर्षीय धर्मेन्द्र उपाध्याय र सोही ठाउँ बस्ने ४५ वर्षीय अनन्त कुमार उपाध्याय रहेका छन् ।
उनीहरूले इन्स्टाग्राम र वाट्स्एपमा फेक आइडीमार्फत् सम्पर्क गरी आफूलाई नेदरल्याण्डको नागरिक र केमिकल ईन्जिनियर बताई आईफोन ११ मोबाईल, ल्यापटप र गोल्ड लगायत बहुमूल्य सामानहरुको बक्स गिफ्ट पठाईदिएको र भन्सार बापत रकम पठाउनुपर्छ भनेर प्रलोभन देखाई पीडितलाई विभिन्न बैंकहरूको खाता नम्बरमा पटक–पटक गरी उक्त रकम जम्मा गर्न लगाई ठगी गरेको प्रहरीले जनाएको छ ।
घटनाको अनुसन्धानको क्रममा महानगरीय अपराध महाशाखाबाट खटिएको टोलीले जिल्ला प्रहरी कार्यालय रुपन्देहीको सहयोगमा रुपन्देहीमा लुकीछिपी बसेका उनीहरूलाई पक्राउ गरेको हो ।