१६ जेठ, एजेन्सी ।
उत्तर कोरियाले जासुसी भूउपग्रह अन्तरिक्षमा पठाउने घोषणा गरेको छ । आगामी जुन महिनामा उत्तरले जासुसी भूउपग्रह अन्तरिक्षमा पठाउने घोषणा गरेपछि अमेरिका र दक्षिण कोरिया सजग बनेका छन् । पछिल्ला दिनहरूमा अमेरिका र दक्षिण कोरियाका सेनाले उत्तर कोरियाली सीमा क्षेत्रमा संयुक्त युद्ध अभ्यास गरिरहेका छन् ।
उत्तरका सर्वोच्च नेता किम जोङ उनले यी दुई राष्ट्रको युद्ध अभ्यासलाई आफ्नो देशमाथि आक्रमणको प्रशिक्षण र योजना भनिरहेका छन् । हाल उत्तर कोरियाले शक्तिशाली क्षेप्यास्त्र परीक्षण कार्यक्रमलाई तीव्रता दिइरहेको छ भने यी दुई राष्ट्रबाट उत्पन्न हुने खतराको निगरानी गर्न भन्दै उसले जासुसी भूउपग्रह प्रक्षेपण तयारी पनि गरिरहेको हो ।
उत्तर कोरियाले जुन महिनामा जासुसी भूउपग्रह अन्तरिक्षमा तैनाथ गर्ने बताएसँगै अमेरिका र दक्षिण कोरिया सजग बनेको अवस्था छ । मंगलबार मात्र दक्षिण कोरियाले अमेरिका र आफ्नो गुप्तचर विभागले उत्तर कोरियाली जासुसी भूउपग्रहको विषयमा चनाखो भएर नजिकैबाट निगरानी गरिरहेको बताएको छ ।
दक्षिण कोरियाली रक्षा मन्त्रालयको नियमित पत्रकार सम्मेलनमा त्यहाँका जोइन्ट चिफ अफ स्टाफ हान सङ–क्युनले भनेका छन्, ‘दक्षिण कोरिया र अमेरिकी गुप्तचर अधिकारीहरूले उत्तर कोरियाली गतिविधि नजिकबाट हेरिरहेका छन् र उत्तर कोरियाले दाबी गरेको तथाकथित भूउपग्रहहरूको सम्भावित उत्तेजनाको निगरानी पनि गरिरहेका छन् । ’सोमबार मात्र उत्तर कोरियाले भूउपग्रहको नाममा क्षेप्यास्त्रहरू परीक्षण गरिरहेको आरोप लगाएको थियो ।
आफ्ना भूमिवरपर ती क्षेप्यास्त्रहरू आएको खण्डमा त्यसलाई आफूले नष्ट गरिदिने पनि जापानको भनाइ छ । जापानी मन्त्रिपरिषद्का मुख्यसचिव हिरोकाजु मात्सुनोले उत्तर कोरियाली क्षेप्यास्त्र कार्यक्रमले जापानलाई असुरक्षा महसुस भएको र आफूहरूले उनीहरूको क्षेप्यास्त्रलाई नष्ट गर्न प्याक–३ मिसाइल प्रणाली तैनाथ गर्न लागेको बताएका थिए । उत्तर कोरियाले धेरैजसो क्षेप्यास्त्र परीक्षण समुद्रमा गर्ने गरेको छ । ती समुद्र भने जापान र दक्षिण कोरिया वरपर पर्छन् ।
