भक्तपुर, ९ जेठ ः विभिन्न देशका विद्यार्थीलाई पछाडि पार्दै अन्तर्राष्ट्रिय अवार्ड हात पार्न सफल विद्यार्थीलाई मध्यपुर थिमिस्थित नवरत्न इंग्लिस सेकेण्डरी स्कूलले सम्मान गरेको छ ।
बंगलादेशको ढाकामा हालै सम्पन्न स्टूडेन्ट क्वालिटी कन्ट्रोल सर्कल (एसक्यूसीसी) सम्मेलन २०१८ को २१ औँ अन्तर्राष्ट्रिय सम्मेलनमा नेपाल तथा नेपालीलाई प्रतिनिधित्व गर्दै उत्कृष्ट पुरस्कार जित्ने विद्यार्थीलाई विद्यालयले मंगलबार सम्मान गरेको हो ।
विद्यालयले जेनी मानन्धर, सुमन श्रेष्ठ, सर्सिज श्रेष्ठ, अन्सु श्रेष्ठ, लसता मानन्धर, जिज्ञासा श्रेष्ठ र स्वन्ती श्रेष्ठलाई सम्मान गरेको छ ।
गत वैशाख २० देखि २३ गतेसम्म ढाकामा भएको सम्मेलनमा भारत, पाकिस्तान, अमेरिका, दक्षिण अफ्रिका, बेलायत, श्रीलंकालगायत नौ देशका २० भन्दा बढी स्कूलको सहभागिता रहेको थियो । सम्मेलनमा सहभागी नवरत्नका विद्यार्थीले तीन फरक विधामा उत्कृष्ट अवार्ड हात पारेका थिए ।
“पाँच फरक विधामध्ये कोलाज, क्विज कन्टेष्ट तथा केस स्टडी एण्ड प्रेजेन्टेसनमा उत्कृष्ट भएर नेपाल फर्किएपछि विद्यालयले विद्यार्थीलाई सम्मान गरेको स्कूलका प्रिन्सिपल सुरेन्द्र श्रेष्ठले बताए । नवरत्न स्कूलबाट नौ जनाको टोलीलाई नेतृत्व गर्दै बंगलादेश पुगेका श्रेष्ठ आफ्ना विद्यार्थी अन्तर्राष्ट्रियस्तरमा प्रतिस्पर्धा गर्न सक्षम भएकोमा उत्साहित छन् ।
कार्यक्रममा टिन एम्बासेडर २०१८ सर्सिज श्रेष्ठ, नइ देरुनिख बाल पुरस्कार विजेता स्वन्ती श्रेष्ठ तथा नइ कोपिला पुरस्कार विजेता सगुन श्रेष्ठलाई प्रदेश ३ का प्रदेश सदस्य राजेन्द्रमान श्रेष्ठले सम्मान गरेकेा हेा ।
ढाकामा सम्पन्न सम्मेलनमा सूर्यविनायक नगरपालिका–२ बालकोटस्थित माउण्ट भ्यू इंग्लिस स्कूलका विद्यार्थीले फरक तीन विधामा उत्कृष्ट अवार्ड हात पारेर शिक्षामा नेपाल विश्वमै प्रतिस्पर्धामा सफल रहेको पहिचान दिएको छ ।
माउण्ड भ्यूका विद्यार्थीमध्ये इशान महर्जन, आयुश बरुवाल, सञ्चन लिम्बू, सगुन श्रेष्ठ, रेश्मा कोइरालाको समूह, अग्र्या खड्का, बाला खड्का, अनन्या पौडेल, दृष्टि सिंह, किरण घले र उदय पौडेलको समूह र आयुश बरुवाल तथा रेश्मा कोइरालाको समूहले क्रमशः होमवर्क कपी, केस स्टडी र वादविवादमा सहभागी अन्य देशका विद्यार्थीलाई पछाडि पार्दै उत्कृष्ट अवार्ड हात पारेको विद्यालयका प्रिन्सिपल राजकुमार महर्जनले जानकारी दिए।
रासस
