२६ मंसिर , काठमाण्डौ ।
दोस्रो संस्करणको नेपाल प्रिमियर लिग (एनपीएल) को फाइनल खेल भोलि हुँदैछ । त्रिवि क्रिकेट रङ्गशालामा दिउँसो साढे ३ बजे हुने फाइनलमा साविक उपविजेता सुदूरपश्चिम रोयल्स र लुम्बिनी लायन्स प्रतिष्पर्धा गर्दैछन् ।
पहिलो क्वालिफायरमा गएको मंगलबार विराटनगरलाई ७७ रनले हराउँदै सुदूरपश्चिम उपाधि नजिक पुगेको हो । लुम्बिनीले दोस्रो क्वालिफायरमा हिजो विराटनगरलाई ४० रनले पराजित गर्दै फाइनलमा स्थान सुरक्षित गरेको हो ।
पहिलो क्वालिफायरमा सुदूरपश्चिमसँग पराजित भएको विराटनगरले दोस्रो क्वालिफायर खेल्ने मौका पाएको थियो । दीपेन्द्रसिंह ऐेरीको कप्तानीमा रहेको सुदूरपश्चिम उपाधि दाबेदार टोली हो ।
गएको वर्ष फाइनलमा जनकपुर बोल्टससँग ५ विकेटले पराजित भएको सुदूरपश्चिम यसपटक उपाधि रक्षा गर्ने लक्ष्यमा छ । गएको संस्करणमा लिग चरणबाटै बाहिरिएको रोहित पौडेलको नेतृत्वमा रहेको लुम्बिनी यसपटक उपाधी जित्ने दाउमा छ ।
लिग चरणमा भएको यी दुबैबीचको खेलमा सुदूरपश्चिमले ७ विकेटको जित हात पारेको थियो । यस सिजन विराटनगर किंग्सलाई पनि उपाधि दाबेदारका रुपमा हेरिएको थियो । तर रोचक के रह्यो भने दुई क्वालिफायरबाट हार भोगेको विराटनगरले दुवै खेलमा सय रन कटाउन सकेन ।
पहिलो क्वालिफायरमा सुदूरपश्चिमसँग ७८ रनमा समेटिएको विराटनगर दोस्रो क्वालिफायरमा लुम्बिनीसँग ९४ रनमा समेटिएको हो । बलिङ युनिटले महत्त्वपूर्ण जिम्मेवारी पूरा गरे पनि फाइनल पुग्नबाट विराटनगर रोकिनुमा ब्याटिङ लाइनको कमजोरी प्रमुख कारण बनेको छ ।
प्रतियोगिताको तेस्रो बन्दै विराटनगरले यस सिजनको यात्रा सकेको हो । यता समूह चरणमा एउटा मात्र हारको सामना गरेको सुदूरपश्चिम दीपेन्द्रसिंह ऐरीको कप्तानीमा मैदानमा छ ।
अर्कातर्फ लिग चरणका सुरुवाती खेलमा कमजोर प्रदर्शन गरेर अन्तिममा जित्नै पर्ने दबाबपूर्ण ६ खेलमा सबै जित निकाल्दै फाइनल पुगेको लुम्बिनीका कप्तान रोहितकुमार पौडेल हुन् ।
रोहित राष्ट्रिय टिमका कप्तान हुन् भने दीपेन्द्र उपकप्तान हुन् । त्यसैले अब भोली कप्तान र उपकप्तानको भिडन्तलाई धेरै चासोका रुपमा हेरिएको छ । लुम्बिनीले दोस्रो क्वालिफायरसमेत गरी लगातार पाँच जित दर्ता गर्दै फाइनलमा स्थान बनाएको हो ।
लिग चरणको खेल सकिँदा सात खेलमा चार जित दर्ता गर्दै प्लेअफमा पुगेको लुम्बिनी लायन्सले एलिमिनेटर र दोस्रो क्वालिफायर चरण पार गर्दै फाइनलमा स्थान बनाउँछ भनेर निकै कमले सोचेका थिए ।
एनपीएलका समर्थकहरूले पनि विराटनगर किंग्स र सुदूरपश्चिम रोयल्सको लिग चरणको खेल हेरेर यी दुईको फाइनल हुने अड्कलबाजी गरेका थिए । तर हरेक अड्कल र अपेक्षा विपरीत लुम्बिनी लायन्सले फाइनलमा स्थान बनाएको हो ।
काठमान्डु गोर्खाज र विराटनगर किंग्सलाई पाखा लगाउँदै लुम्बिनी लायन्सले फाइनलको यात्रा तय गरेको हो । दोस्रो क्वालिफायरमा विराटनगर किंग्सलाई हराएपछि लुम्बिनी लायन्सका ओपनिङ ब्याटर डार्सी सर्टले भन्छन्, ‘हाम्रो लागि गुमाउनु केही पनि छैन । प्रेसर सुदूरपश्चिम रोयल्सलाई हुनेछ।’
उनले लुम्बिनी लायन्सलाई ‘अन्डरडग’को रूपमा आएको टिम भएकाले प्रेसर नहुने बताएका छन् । ‘हामीलाई अन्डरडगको रुपमा हेरिएको थियो। हामी जसरी खेल्यौं, त्यस हिसाबले कुनै पनि प्रेसर हुने छैन। आशा छ हामीले यस्तै खेल्छौ र ट्रफी पनि जित्नेछौँ।’
हुन पनि लिग चरणको उतारचढाव र त्यसपछि लगातारको जितसँगै लुम्बिनीको मानसिकता भने बलियो रहेको छ । लिग चरणको तालिकामा आफूभन्दा माथि रहेका दुई टोलीलाई पाखा लगाउँदै फाइनलमा स्थान बनाएकाले लुम्बिनी फाइनल खेलमा पनि उपाधिमै आफ्नो नजर राख्नेछ ।
तर सुदूरपश्चिमलाई हराउन निकै नै मेहेनेत गर्नुपर्ने हुन्छ । सिजनभर एक खेलमात्र हारेको रोयल्स सुदूरपश्चिमको बाघजस्तै बनेको छ । मैदानमा शिकार कसरी गर्ने भनेर उसका रणनीतिहरुले अहिलेसम्म साथ दिइरहेका बेला फाइनलमा उपाधि घर लैजानेमा उ ढुक्क छ ।
त्यसैले भोलीको फाइनल निकै नै प्रतिस्पर्धात्मक र रोचक हुनेछ । यस्तै भोली एपिएलको विजेताले एक करोड १० लाख पुरस्कार प्राप्त गर्नेछ । दोस्रो हुने टोलीले ५१ लाख, तेस्रो भएको विराटनगरले २५ लाख र चौथो भएको काठमाडौं गोर्खाजले १५ लाख प्राप्त गर्नेछ ।
यस्तै सर्वोत्कृष्ट नेपाली खेलाडीलाई प्रदान गरिने कारका लागि पाँच जना दाबेदार रहेका छन् । जसमा फाइनल खेल मात्रै बाँकी रहँदा तीन जना ब्याटर उत्कृष्ट खेलाडीका लागि दाबेदार छन् ।
तर, सर्वाधिक रन बनाउने खेलाडीको शीर्षस्थानमा रहेका एडम रोसिङटनको टोली पोखरा एभेन्जर्स लिग चरणबाटै बाहिरिसकेको छ । उनी इङ्ल्यान्डका खेलाडी हुन् । त्यसैले सर्वाधिक रन बनाउने खेलाडीको दोस्रो र तेस्रो स्थानमा रहेका सुदूरपश्चिम रोयल्सका विनोद भण्डारी र लुम्बिनी लायन्सका रोहित पौडेल दाबेदार बनेका हुन् ।
बलरतर्फ पनि सर्वाधिक विकेट लिने खेलाडीको सूचीमा शीर्ष तीन स्थानमा रहेका विराटनगर किंग्सका सन्दीप लामिछाने, सुदूरपश्चिमका अविनाश बोहरा र लुम्बिनी लायन्सका शेर मल्ल छन् ।
सन्दीपको टोली विराटनगर दुवै क्वालिफायरमा पराजित हुँदै प्रतियोगितबाट बाहिरिइसकेको छ भने अविनाशको सुदूरपश्चिम र शेरको लुम्बिनी उपाधिको दौडमा छ । ब्याटिङ र बलिङमा यी पाँच जनालाई पछ्याइरहेका अन्य नेपाली खेलाडी धेरै पछाडि छन् ।
उनीहरूका टोली पनि प्रतियोगिताबाट बाहिरिइसकेका छन्। एनपीएलमा कारको दाबेदारमध्ये पहिलो नम्बरमा छन्, विनोद भण्डारी । सुदूरपश्चिम रोयल्सका विकेटकिपर ब्याटर भण्डारी सर्वाधिक रन बनाउने खेलाडीको सूचीमा दोस्रो नम्बरमा छन् ।
उनले आठ खेलमा दुई सय ६४ रन बनाएका छन् । पहिलो नम्बरमा रहेका पोखरा एभेन्जर्सका एडम रोसिङटनले तीन सय २३ रन बनाएका छन् । एनपीएलमा विनोदले दुई वटा अर्धशतक बनाएका छन् ।
दुवै पटक प्लेअर द म्याच भएका छन्। एनपीएलमा दुई अर्धशतक बनाउने अर्का नेपाली खेलाडी पोखराका कुशल भुर्तेल मात्रै हुन् । कारका अर्का दाबेदार हुन्, रोहित पौडेल । लुम्बिनी लायन्सका कप्तान रोहित सर्वाधिक रन बनाउने खेलाडीको सूचीमा तेस्रो नम्बरमा छन् ।
उनले नौ खेलमा दुई सय ६० रन बनाएका छन् । उनको सर्वाधिक स्कोर ४९ रन हो । लुम्बिनीका लागि पाँचौ खेलमा पोखरालाई तीन विकेटले पराजित गर्दा रोहित प्लेअर अफ द म्याच भएका थिए ।
यस्तै सातौं खेलमा जनकपुरविरुद्ध ३४ रन बनाएर उनी प्लेअर अफ द म्याच भएका थिए । विराटनगर किंग्स दोस्रो क्वालिफायरमा पराजित भए पनि कप्तान सन्दीप लामिछाने कारको दाबेदार छन् ।
उनले नौ खेलमा १७ विकेट लिएका छन्। सर्वाधिक विकेट लिनेको सूचीमा उनी शीर्षस्थानमा छन् । एनपीएलमा ३६ ओभर बलिङ गरेका सन्दीपले एक सय ७७ रन मात्रै खर्चेका छन् । उनले औषतमा प्रतिओभर ४.९१ का दरले रन दिएका छन् भने औषतमा १०.४१ प्रतिशतका दरले विकेट लिएका छन् ।
एनपीएलमा उनले जनकपुरविरुद्ध उत्कृष्ट बलिङ गरेका थिए । चार ओभर बलिङ गर्दा ११ रन खर्चेर चार विकेट लिएका थिए । त्यस खेलमा उनी प्लेअर अफ द म्याच भएका थिए । एक खेलबाहेक उनले आठ खेलमा विकेट लिएका छन् ।
कारको दाबेदारका रुपमा रहेका अर्का बलर हुन्, अविनास बोहरा । सुदूरपश्चिम रोयल्सलाई फाइनलमा पु¥याउन महत्त्वपूर्ण भूमिका खेलका अविनाश सर्वाधिक विकेट लिने बलरको सूचीमा दोस्रो नम्बरमा छन् ।
उनले आठ खेलमा १६ विकेट लिएका छन् । उनले जनकपुर बोल्टसविरुद्ध उत्कृष्ट प्रदर्शन गरेका थिए । त्यो खेलमा चार ओभर बलिङ गरेका अविनाशले ३० रन खर्चेर चार विकेट लिएका थिए । अविनाशको एनपीएल यात्रा सम्झनलायक बनेको छ। उनले सबै खेलमा विकेट लिएका छन् ।
यस सिजन चम्किएका युवा बलर शेर मल्ल पनि कारको दाबेदार छन् । लुम्बिनी लायन्सको भरपर्दो खेलाडी शेर सर्वाधिक विकेट लिने खेलाडीको सूचीमा तेस्रो नम्बरमा छन् । उनले नौ खेलमा १४ विकेट लिएका छन् ।
शेरले काठमाडौं गोर्खाजविरुद्धको खेलमा उत्कृष्ट प्रदर्शन गरेका थिए। चार ओभरमा २२ रन खर्चेर तीन विकेट लिएका थिए । लुम्बिनीले काठमाडौँलाई चार विकेटले पराजित गरेको खेलमा उनी प्लेअर अफ द म्याच भएका थिए ।
यस्तै विराटनगरविरुद्ध तीन विकेट लिएको छैटौं खेलमा उनी प्लेअर अफ द म्याच पनि भएका थिए । सातौँ खेलमा जनकपुरविरुद्ध दुई विकेट लिएर उनले लुम्बिनीलाई प्लेअफमा पुग्न सघाएका थिए ।
आठौं खेल अर्थात प्लेअफमा काठमाडौँविरुद्ध तीन विकेट लिएका थिए । काठमाडौँलाई चार विकेटले हराएर लुम्बिनी दोस्रो क्वालिफायरमा पुगेको खेलमा उनी प्लेअर अफ द म्याच भएका थिए ।
बिहीबार भएको विराटनगरविरुद्धको दोस्रो क्वालिफायरमा पनि उनले एक विकेट लिए भने सात रन बनाए । कारको दाबेदार रहेका पाँच खेलाडीमध्ये सुदूरपश्चिमका विनोद र अविनाश तथा लुम्बिनीका रोहित र शेरको प्रदर्शन उपाधि जित्नका लागि दुवै टोलीलाई महत्त्वपूर्ण हुनेछ ।
सुदूरपश्चिमका कप्तान दीपेन्द्रसिंह ऐरीले गत वर्षको एनपीएलमा उत्कृष्ट खेलाडी बन्दै कार जितेका थिए ।
