२४ मंसिर , काठमाण्डौ ।
अमेरिकामा राष्ट्रपति डोनाल्ड ट्रम्प प्रशासनले अध्यागमन (इमिग्रेसन) नियम कडा बनाएपछि ८५ हजार भिसा रद्द गरिएको छ । गएको जनवरीदेखि हालसम्म ८५ हजार भिसा रद्द गरिएको यूएस स्टेट डिपार्टमेन्टले सामाजिक सञ्जाल एक्समा उल्लेख गरेको छ ।
यसले अध्यागमन प्रवर्तन र सीमा सुरक्षामा ट्रम्प प्रशासनको बढ्दो कडाइलाई जनाउँछ । भिसा रद्द गरिएका मध्ये आठ हजारभन्दा बढी विद्यार्थी छन् । यो अघिल्लो वर्षको तुलनामा दोब्बरभन्दा पनि बढी हो । एक्समा यूएस स्टेट डिपार्टमेन्टको उक्त पोस्टमा ट्रम्पको एउटा तस्बिर पनि सेयर गरिएको छ ।
त्यसमा ‘मेक अमेरिका सेफ अगेन’ लेखिएको छ । एक वरिष्ठ अधिकारीले मादकपदार्थ सेवन गरेर गाडी चलाउनु, चोरी, आक्रमणजस्ता अपराध भिसा रद्द गरिनुको प्रमुख कारण भएको बताएका छन् । केही भिसाको म्याद समाप्त, आतंकवादको समर्थनसँग जोडिएको जाँच र अरू गम्भीर कारणले पनि रद्द गरिएको जनाइएको छ ।
अमेरिकाको यो पोस्टले भिसा नियमहरूमा प्रशासनको कडाईको सङ्केत गरेको छ । प्रशासनले अक्टोबरमा कन्जरभेटिभ कार्यकर्ता चार्ली किर्कको हत्याको खुशी मनाएको आरोप लागेका मानिसहरूको भिसा पनि रद्द गरेको थियो ।
गाजा द्वन्द्वसँग सम्बन्धित विरोध प्रदर्शनहरूमा संलग्न अन्तर्राष्ट्रिय विद्यार्थीहरू पनि कडा निगरानीको दायरामा परेका छन् । विदेश मन्त्रालयले एक्समा राष्ट्रपति ट्रम्पको तस्बिरसहित ’मेक अमेरिका सेफ अगेन’ नारा पनि साझा गरेको छ ।
गत अगस्टमा, मन्त्रालयले वैध अमेरिकी भिसा भएका ५५ मिलियनभन्दा बढी विदेशीहरू माथि देशमा रहँदा निगरानी बढाउनका लागि लगातार अनुगमन प्रणाली लागू गर्ने घोषणा गरेको थियो । अमेरिकाले भिसा नियमहरूलाई निरन्तर कडा बनाइरहेको छ।
डिसेम्बर ५ मा राष्ट्रपति डोनाल्ड ट्रम्पले एच–वानबी भिसा नियममा कडाइका लागि आदेश दिएका छन् । यस अन्तर्गत, एच–वानबी आवेदकहरूले आफ्नो सोशल मिडिया खाता सार्वजनिक गर्नुपर्नेछ, जसबाट अमेरिकी अधिकारीहरूले आवेदकको प्रोफाइल, पोस्ट र लाइकहरू हेर्न सक्नेछन् ।
यदि आवेदकको कुनै पनि सोशल मिडिया गतिविधि अमेरिकी हितको विरुद्ध देखिएमा एच–वानबी भिसा जारी गरिने छैन । एच–वानबी भिसाका आश्रितहरू (पत्नी, बालबालिका र आमाबाबु) का लागि एच–फोर भिसा प्राप्त गर्न पनि सोशल मिडिया प्रोफाइल सार्वजनिक गर्नु अनिवार्य गरिएको छ ।
एच–वानबी भिसाका लागि सोशल मिडिया प्रोफाइल जाँच अनिवार्य गरिएको यो पहिलो पटक हो, र यी नयाँ नियमहरू डिसेम्बर १५ देखि लागू हुनेछन्। ट्रम्प प्रशासनले यसका लागि सबै दूतावासहरूलाई निर्देशन जारी गरिसकेको छ ।
अगस्ट महिनादेखि नै अध्ययन भिसा एफ–वान, एम–वान र जे–वानसँगै आगन्तुक (भिजिटर) भिसा बी–वान र बी–टुका लागि पनि सोशल मिडिया प्रोफाइल सार्वजनिक गर्नुपर्ने अनिवार्यता लागू भइसकेको छ।
यी सबै कदमहरूले भिसा उल्लङ्घनमाथि कठोर कारबाही र अध्यागमन नियन्त्रणलाई बलियो बनाउने दिशामा प्रशासनको आक्रामक नीतिलाई देखाउँछन् । यसैबीच राष्ट्रपति ट्रम्पले कृषि आयातमा नयाँ ‘ट्यारिफ’ लगाउने संकेत गरेका छन् ।
त्यसमा भारतीय चामल र क्यानडाली मल समावेश हुन सक्नेछ । ट्रम्पको यो कदम अमेरिकी किसानको गुनासोपछिको हो । अमेरिकी किसानले सस्ता विदेशी उत्पादनले स्वदेशी कृषि उत्पादकलाई नोक्सान पु¥याइरहेको बताएका छन् ।
ब्लुमबर्गको रिपोर्टअनुसार, ट्यारिफबाट प्रभावित अमेरिकी किसानका निम्ति ४१२ अर्ब डलरको राहत प्याकेज घोषणा गर्न ह्वाइट हाउसमा आयोजित एक बैठकका क्रममा ट्रम्पले भारत र क्यानडामाथि नयाँ ट्यारिफ लगाउने संकेत गरे ।
उनले केही देशले अमेरिकी बजारमा कम मूल्यमा चामल ‘डम्पिङ’ गरिरहेको भन्ने दाबीमाथि सरकारले जाँच गर्ने बताए । त्यस्तो पाइए नयाँ ट्यारिफ लगाइने उनले स्पष्ट पारे । बैठकमा उपस्थित किसानले ट्रम्पलाई कडा अडान लिन दबाब दिएका थिए ।
उनीहरूको तर्कअनुसार कम मूल्यमा विदेशबाट आयातित चामलले अमेरिकी बजारलाई गम्भीर रूपमा प्रभावित गरिरहेको छ । किसानको गुनासोपछि ट्रम्पले तिखो प्रतिक्रिया दिँदै यसो गर्ने देशहरूले अमेरिकालाई धोका दिइरहेको बताए ।
क्यानडाबाट आयात गरिने मल पनि अर्को निसाना हुन सक्ने उनले उल्लेख गरे । लुइजियानास्थित केनेडी राइस मिलकी सीईओ मेरिल केनेडीले ट्रम्पलाई ‘डम्पिङ’ गर्ने शीर्ष देशमा भारत, थाइल्यान्ड र चीन रहेको जानकारी दिइन् ।
