१३ भदौ , एजेन्सी ।

अमेरिकामा नेपाली युवती मुना पाण्डेमाथि गोली चलाउने पुरुषको तस्बिर प्रहरीले सार्वजनिक गरेको छ ।  मुना प्रेम सम्बन्धमा रहेका युवक यस घटनामा संलग्न हुनसक्ने आशंका यसअघि गरिएको थियो । तर सार्वजनिक भएको तस्बिरमा देखिएका मानिस ती युवक नहरेको प्रहरीले बताएको छ ।

स्थानीय सञ्चार माध्यमका अनुसार अभियुक्तको पहिचान भने खुल्न सकेको छैन् । घटना र अभियुक्तबारे अनुसन्धान भइरहेको प्रहरीको भनाइ छ । अभियुक्त पहिचानका लागि समुदायको सहयोग मागेको छ ।चिन्ने र देख्ने व्यक्तिहरूलाई प्रहरीमा खबर गर्न भनिएको छ ।

ह्युस्टन कम्युनिटी कलेजमा अध्ययनरत २१ वर्षीय मुना पाण्डेको गत सोमबार साँझ गोली हानी हत्या गरिएको थियो । सिसीटिभी फुटेजअनुसार मुना मृत भेटिएको स्थानमा अभियुक्त अगस्ट २४ को बेलुका ९ बजेर ४८ मिनेटमा देखिएका छन् ।

प्रहरीले ती व्यक्ति को हुन् भन्ने पहिचान नभएको बताएको छ । मुना नेपालको भोजपुरकी स्थायी बासिन्दा हुन् । शनिबारदेखि सम्पर्कविहीन रहेकी उनी सोमबार आफ्नै घरमा मृत भेटिएकी थिइन् । ह्युस्टन प्रहरीले उनीमाथि एकभन्दा बढी राउन्ड गोली प्रहार भएको बताएको छ ।

अमेरिकाबाट प्रकाशन हुने नेपाली अखबार नेप्योर्कलाई काठमाडौंमा रहेकी मुनाको आमा अनिता पाण्डेले शनिबारदेखि छोरी आफ्नो सम्पर्कमा नरहेको बताएकी थिइन् । आफ्नी छोरी एकजना अमेरिकी नागरिकसँग प्रेम सम्बन्धमा रहेको र सम्बन्धलाई लिएर केही तनावमा रहेको पनि अनिताले नेप्योर्कसँग बताएकी थिइन् ।

प्रहरीले सिसीटिभीमा हेर्दा भने प्रेमी भनिएका व्यक्ति नरहेको बताइसकेको छ । मुना सन् २०२१ मा अध्ययनका लागि अमेरिका गएकी थिइन् । मुनाको शव पोस्टमार्टम गरी ह्युस्टन प्रहरीले घटनाको अनुसन्धान गरिरहेको छ ।

पाण्डेको अन्तिम संस्कारका लागि नेपालबाट उनकी आमा अनिता पाण्डे अधिकारी अमेरिका जान चाहेकी छन् । तर उनले आर्थिक समस्या भएको बताएकी छन् । यसैबीच मुनाको अन्तिम संस्कार तथा उनकी आमालाई अमेरिका यात्राका लागि खर्च जुटाउन गोफन्डमी अभियान सुरु गरिएको छ ।

२५ हजार डलर संकलन गर्ने लक्ष्यसहित सुरु गरिएको गोफन्डमी अभियानमा अहिलेसम्म १० हजार डलर संकलन भइसकेको छ । यो अभियानमा सहयोगका लागि सबैसँग अपिल गरिएको छ ।

मुनाकी आमा अनितालाई छोरीको अन्तिम संस्कारका लागि अमेरिका ल्याउन समेत आर्थिक सहयोग गर्नुपर्ने देखिएको अभियानले जनाएको छ । एकल महिला अनिताले मुना आफ्नी एक मात्र सन्तान भएको र उनी पनि बितेपछि आफ्नो संसारै सकिएको दुखेसो गरेकी छन् ।

छोरीको न्यायका लागि हत्यारा जसरी पनि पत्ता लगाउन उनले सम्बन्धित सबैसँग आग्रह पनि गरेकी छन् ।