२९ फागुन ,एजेन्सी ।
अल–कायदाका नेता खालिद बतारफीको मृत्यु भएको छ । अल–कायदाको यमन शाखाले आफ्ना नेता बतारफीको मृत्यु भएको जानकारी दिएको हो । यद्यपि उनको मृत्यु के परिस्थितिमा भएको हो भन्नेबारे कुनै जानकारी आएको छैन । अल–कायदा इन द अरेबियन पेनिन्सुला (एक्यूएपी) को भिडियोमा बतारफीको शव कफनमा बेरिएको देखाइएको छ ।
उनको शरीरमा संगठनको ब्यानर बेरिएको छ । संगठनसँग सम्बद्ध एक वरिष्ठ सदस्यले उनको मृत्यु कसरी भयो भन्ने खुलाउन चाहेनन् । तर उनले आफ्नो पूर्ववर्ती जस्तै ‘मारिएनन’ भन्ने शब्द प्रयोग गरेका छन् । साउदी अरबका नागरिक बतारफी आफ्नो उमेरको चौथो दशकमा थिए । उनी २०२० मा एक्यूएपीको नेता बने ।
अमेरिकाले सन् २०१८ मा उनलाई ‘वैश्विक आतंकवादी’ को सूचीमा राखेको थियो । उनीमाथि पचास लाख डलर पुरस्कार राखिएको थियो । एक्यूएपीको मिडियाद्वारा एक सोशल मिडिया पोस्टमा संगठनका अधिकारी अबु खुबयब अल–सुदानीले बतारफीको मृत्युको बारेमा जानकारी दिने बयान पढिरहेको देखिन्छ ।
उनलाई कसैले आक्रमण गरी मारेको हो भन्ने कुरा भने त्यहाँ उल्लेख गरिएको छैन । यसअघि गत वर्षको साउनमा अमेरिकी राष्ट्रपति जो बाइडनले अल–काइदाका प्रमुख नेता आएमन अल जवाहिरीको अमेरिकी सेनाको आक्रमणमा मृत्यु भएको पुष्टि गरेका थिए ।
अमेरिकी गुप्तचर संस्था सिआइएले अफगानिस्तानको राजधानी काबुलमा गरेको ड्रोन आक्रमणमा अल–काइदाका नेता जवाहिरीको मृत्यु भएको राष्ट्रपति बाइडनले उल्लेख गरेका थिए । सन् २०११ मा ओसामा बिन लादेनको मृत्यु पछि अल जवाहिरीले अलकाइदाको नेतृत्व गरेका थिए ।
अल जवाहिरी अमेरिकीमा सन् २००१ मा भएको आतङ्ककारी हमलाका मुख्य योजनाकारका रुपमा लिइन्छ । “नाइन इलाभेन” नाम दिइएको त्यस घटनामा दुई हजार नौ सय छयानब्बे जनाको मृत्यु भएको थियो ।
