३ मंसिर, काठमाण्डौ।
मिलेनियम च्यालेन्ज कर्पोरेसन (एमसीसी) ले नेपालका लागि एमसीसी कम्प्याक्टमा अतिरिक्त ५ करोड अमेरिकी डलर (करिब ७ अर्ब रुपैयाँ) अनुदान थप गर्ने भएको छ। यससँगै परियोजनाअन्तर्गत उपलब्ध कुल सहायता ७४ करोड ७० लाख अमेरिकी डलर (लगभग १ खर्ब ६ अर्ब रुपैयाँ) पुगेको छ ।
सम्झौताअनुसार अमेरिकाबाट कुल ५५ करोड डलर र नेपाल सरकारबाट १९ करोड ७० लाख डलर लगानी हुनेछ । एमसीसीले उपलब्ध गराएको यो अतिरिक्त सहयोगले नेपालका प्राथमिकता प्राप्त प्रसारणलाइन तथा ऊर्जा पूर्वाधार परियोजनालाई पूर्णता दिन महत्त्वपूर्ण टेवा पु¥याउने बताइएको छ ।
अमेरिकी दूतावासले एक स्टेटमेन्टमाफत भनेको छ, ‘यो आर्थिक सहयोगले अमेरिका र नेपालबिच रहेको चिरस्थायी साझेदारी प्रतिबिम्बित गर्दछ । दशकौंसम्म हाम्रा देशहरूले आर्थिक वृद्धि, ऊर्जा सुरक्षा र पारस्परिक समृद्धिलाई अघि बढाउन सँगै काम गरेका छन् । एमसीसी नेपाल सम्झौताले उच्च प्रभावयुक्त पूर्वाधारमा केन्द्रित, ऋणरहित र अनुदानमा आधारित सहायतामार्फत उक्त इतिहासलाई निरन्तरता दिएको छ ।’
यसले ऊर्जा ग्रिडको सुदृढीकरण, उत्पादन–प्रसारण–व्यापार श्रृंखलामा विश्वसनीयता बढाउने र क्षेत्रीय ऊर्जा व्यापारलाई अझ सुदृढ बनाउने अपेक्षा गरिएको बताएको छ।
अनुदानले नेपाललाई अन्तर्राष्ट्रिय ऊर्जा कनेक्टिभिटीमा थप मजबुत बनाउने, बजार पहुँच सुधार गर्ने र ऊर्जा पूर्वाधार निर्माणमा अमेरिकी उत्कृष्टता तथा प्रविधिको उपयोग बढाउने उल्लेख गरिएको छ ।
यससँगै अमेरिकी कम्पनी तथा प्रविधि प्रदायकका लागि नेपाली ऊर्जा बजारमा प्रवेशको अवसरसमेत विस्तार हुनेछ । अमेरिकी दूतावासले यो सहायता नेपाल–अमेरिका सम्बन्धको दीर्घकालीन साझेदारी र पारस्परिक समृद्धिको साझा प्रतिबद्धताको प्रतीकका रुपमा अथ्र्याएको छ ।
एमसीसी कम्प्याक्ट ऋणरहित अनुदानमा आधारित उच्च प्रभावयुक्त पूर्वाधार निर्माणमा केन्द्रित कार्यक्रम भएकाले दीर्घकालीन आर्थिक वृद्धि र ऊर्जा सुरक्षामा यसको योगदान महत्वपूर्ण हुने अपेक्षा गरिएको छ ।
एमसीसीले नेपालमा लागू भएको दुई वर्ष बित्न लाग्दा प्रभावकारी रुपमा काम भने हुन सकेको छैन् । दुवै तर्फबाट खर्च गर्ने भनेर छुट्टाइएका बजेटहरु न्युन खर्च भइरहेका छन् । यसले परियोजनाहरु समयमै सकिनेमा आशंका उब्जाउँदै आएको छ ।
