२० माघ, विराटनगर ।
आसन्न राष्ट्रपति निर्वाचन तथा रिक्त रहेको गृहमन्त्रालयको रस्साकस्समिा शीर्ष दल र सरकार नै रुमलिरहेका बेला नेपालमा सक्रिय र हस्तक्षेपकारी भूमिका खेलेको आरोप लाग्ने गरेका भारत र अमेरिकामा राजदूतहरु भने जिल्ला दौडामा निस्किएका छन् ।
पछिल्लो समय अमेरिकी राजदूत डिन आर थोम्सन प्रदेश १ को राजधानी विराटनगर आएका छन् भने भारती राजदूत नवीन श्रीवास्तव मधेश प्रदेशको राजधानी जनकपुर पुगेका छन् । बिहीबार विराटनगर पुगेका अमेरिकी राजदूतले विराटनगर महानगरपालिकाका मेयर नागेश कोइराला नेतृत्वको टोलीसँग छलफल गरेको छ ।
नेपालका लागि अमेरिकाका राजदूत डिन आर थोम्सन र महानगर नेतृत्वबीच शिष्टाचार भेट भएको महानगरका मेयर नागेश कोइरालाको सचिवालयले जनाएको छ। महानगरका तर्फबाट मेयर कोइरालासहित उपमेयर शिल्पा निराला कार्की, प्रमुख प्रशासकीय अधिकृत विष्णुप्रसाद कोइरालाका र राजदूत थोम्सनका साथै दूतावासका कर्मचारीहरुका सो भेटवार्तामा सहभागिता रहेको थियो ।
त्यसपछि स्थानीय होटल हेरिसनमा अमेरिकी राजदूतको टोलीले प्रदेश नम्बर १ का मुख्यमन्त्री हिक्मतकुमार कार्कीलगायतसँग छलफल गरेको जनाइएको छ । मुख्यमन्त्रीसँगको भेटपछि राजदूतको टोलीले रानी मस्जिद र जोगबनीस्थित माइती नेपालको कार्यालय अवलोकन गरेको थियो ।
उता मधेस प्रदेशको राजधानी पुगेका भारतीय राजदूतले जनकपुरको होटल सीताशरणमा लोसपाका केन्द्रीय अध्यक्ष महन्थ ठाकुर र वरिष्ठ नेता राजेन्द्र महतोसँग छलफल गरेका छन् । उनले अन्य दलका नेताहरुसँग छलफल गरेका छन् । राजदूत श्रीवास्तव वीरगञ्जस्थित भारतीय महावाणिज्य दूतावासको आयोजनामा भएको दुई दिने गोष्ठीमा भाग लिन जनकपुर गएका हुन् ।
जनकपुरमा नेपाल–भारत मैंत्री युवा संघ केन्द्रिय समितिले शुक्रबार जनकपुरमा उनको स्वागत गरेको छ । सो कार्यक्रममा बोल्दै राजदूत श्रीवास्तवले भारत सरकार नेपालको विकासमा जोड दिन सधैं प्रतिवद्ध रहेको बताएका छन् ।
राजदुत श्रीवास्तवले नेपालको विकास भए भारतलाई पनि फाईदा हुने भएकाले भारत सरकार नेपालको विकासमा आवश्यक सबै खालको सहयोग गर्न पूर्ण रुपमा लागि परेको समेत स्पष्ट पारेका छन् । उनले जनकपुर–जयनगर रेल सेवा विस्तार गरेर जनकपुरलाई धार्मिक पर्यटकीय क्षेत्रको रुपमा विकास गर्न भारत सरकार लागि परेको बताएका छन् । राजदुत श्रीवास्तवले भारतको सहयोगमा नेपालमा संचालित परियोजनाहरुमा थप सहयोग अभिवृद्धि गर्ने दिशामा आफूले सक्दो पहल गर्ने वचन दिएका छन् ।
