२६ बैशाख, काठमाडौँ ।
राष्ट्रिसभाका सांसदहरुले नेपालमा पिसिआर परीक्षणको दायरा बढाउन र विदेशमा रहेका नेपालीहरुको उचित व्यवस्थापन सहित उद्धार गर्न सरकारसँग माग गरेका छन् । शुक्रबारबाट सुरु भएको राष्ट्रियसभाको छैठौँ अधिवेशनमा बोल्ने सांसदहरुले पिसिआर परीक्षण न्यून रहेको र विदेशमा रहेका नेपालीहरु समस्यामा परेकाले उद्धारका लागि सरकारसँग माग गरेका हुन् ।
सत्तारुढ नेपाल कम्युनिष्ट पार्टी (नेकपा) राष्ट्रियसभा दलका नेता दिनानाथ शर्माले पीसिआर परीक्षणलाई ब्यापक बनाउन सरकारसँग आग्रह गरे । भारतीय सीमा क्षेत्रमा नेपाली नागरिकहरु अलपत्र परेको, उपचार तथाा श्रम गर्न गएका नागरिकहरु भारत मै अलपत्र रहेकाले उनीहरुको उद्धारका लागि ध्यान दिन पनि उनले आग्रह गरे । साथै प्रवासमा रहेका नेपालहरुको विषयमा ध्यान दिन पनि उहाँले सरकारसँग आग्रह गरे । शर्माले आगामी वर्षको नीति तथा कार्यक्रम र बजेटलाई परिवर्तित परिस्थित अनुसार ल्याउनुपर्नै बताए । १० औं लाख युवाहरु विदेशमा रोजगारी गुमाएर सीमसहित स्वदेश फर्किने भएकाले उनीहरुको व्यवस्थापन हुनेगरी बजेट आउनेमा आफु विश्वस्त रहेको उनले बताए । अब कृषि क्षेत्रलाई पहलिो प्राथमिकतामा राखेर अगाडी बढ्नुपर्नेमा उनले जोड दिए ।
नेपाली कांग्रेस दलका नेता राधेश्याम अधिकारीले कोरोना महामारीका कारण मुलुकको अवस्था अन्यौलग्रस्त बनेको उल्लेख गर्दै स्वास्थ्य सामग्री अभावमा पर्याप्त परीक्षण हुन नसकेको बताए । सीमा क्षेत्र र प्रवासमा रहेका नेपाली नागरिकहरुलाई कसरी भित्र्याउने भन्ने विषयमा सरकारको कुनै योजना नरहेको उनले बताए । नागरिकको स्वदेश फर्किने पाउने अधिकारमाथि अवैध बन्देज सरकारले लगाएको आरोप सांसद अधिकारीले लगाउनुभयो । रेमिट्यानसमा चलेको मुलुकको सरकारले श्रमिकका पीडाहरु बुझ्न नसक्नु दुःखद रहेको उनको भनाई छ । योजनावद्ध रुपमा समयतालिका बनाएर स्वदेश फर्काउने कुरामा आश्वस्त पार्न नसके आफ्ठ्यारो परिस्थितिमा सरकारले आफ्नो उपस्थिति जनाउन सक्दैन भने सरकार किन चाहियो भन्ने प्रश्न उठ्ने उनले बताए । लक डाउनको डेढ महिना वितेपनि पर्याप्त स्वास्थ सामग्री ल्याउन नसक्नु, सामान खरिदमा अनियमितताका कुरा बाहिर आउनु दुःखद भएकोले दैव भरोसा बाँच्नुपरेको उनले बताए । परीक्षणको दायरा बढाउनुपर्ने, औषधि लगायत आवश्यक सामग्री यथसिघ्र उपलब्ध गराउनुपर्ने र भारत लगायत तेस्रो मुलुकमा रहेका नेपालीहरुको उचित व्यवस्थापन सहित फर्काउने व्यवस्था गर्न उनले सरकारसँग माग समेत गरे । एसईई लगायतका परीक्षा सञ्चालनको विषयमा समेत प्रष्ट पार्न पनि उहाँले सरकारको ध्यानकर्षण गराए । आगामी आर्थिक वर्षको बजेट कृषिलाई टेवा पुग्ने गरी ल्याउन नसकिए भोकमरीको समस्या हुन सक्ने उनले बताए । विदशेबाट आउने श्रमिकलाई ध्यान दिएर आगामी योजना बनाउन पनि उहाँले सरकारलाई आग्रह गरे ।
जनता समाजवादी पार्टी नेपालका संसदीय दलका नेता प्रमिला कुमारीले नेपालमा प्रयाप्त पिसिआर परीक्षण नभएकाले वास्तविक संक्रमितको तथ्याङ्क आउन नसकेको बताइन् । भारतसँग सीमा जोडिएका तराईका क्षेत्रमा संक्रमणको उच्च जोखिम रहेकाले त्यसतर्फ ध्यान दिन पनि उनले आग्रह गरिन । सांसद प्रमिला कुमारीले कोरोना रोकथामका लागि सरकारले छुट्टै ऐन कानून बनाएर अगाडी बढ्नुपर्नेमा दल फुटाउने कानून ल्याउन तर्फ सरकार अग्रसर भएको बताइन् । उनले प्रधानमन्त्री केपी शर्मा ओलीको इस्र्यालु र संकिर्ण स्वभाव छर्लंग भएको उल्लेख गर्दै राष्ट्रपति विद्यादेवी भण्डारी सुझबुझ नभएको महिला भएको समेत बताइन् । राहत वितरण कार्यकर्तामुखि भएको, विदेशमा रहेका नेपालीहरुको समस्या सम्बोधन गर्नुको सट्टा सरकार कमिसनमा रमाएको आरोप उनले लगाइन् । कोरोना नियन्त्रणका लागि अग्रपंक्तिमा रहेका स्वास्थ्यकर्मीहरुको मासिक तलब दोब्बर बनाउनुपर्ने, जीवन बिमाको व्यवस्था र आवश्यक सम्पूर्ण स्वास्थ्य सामग्रीको व्यवस्थापन समेत गर्न आग्रह गरिन् । यस्तै सुरक्षाकर्मी र कोरोना नियन्त्रणका लागि खटिएका अन्य व्यक्तिहरुका लागि विशेष प्याकेज ल्याउन पनि आग्रह गरिन् ।
