६ माघ, एजेन्सी । अस्ट्रेलियाविरुद्धको चौथो तथा निर्णायक टेस्टमा भारतले अस्ट्रेलियालाई मंगलबार ३ विकेट पराजित गरेको छ । जितसँगै भारतले ४ खेलको सिरिज २-१ ले कब्जा गरेको छ ।
पहिलो टेस्टमा अस्ट्रेलिया विजयी हुँदा दोस्रो टेस्टमा भारतले जित निकालेको थियो। तेस्रो टेस्ट बराबरीमा सकिएको थियो ।
ब्रिसबेनमा भएको चौथो टेस्टमा अस्ट्रेलियाले दिएको ३२८ रनको लक्ष्य भारतले ७ विकेटको क्षतिमा पूरा ग¥यो ।
ब्रिसबेनमा अस्ट्रेलियाले ३३ वर्षमा पहिलो पटक पराजय भोगेको हो ।
भारतको जितमा रिशव पन्तले उत्कृष्ट ब्याटिङ गरे। उनले दोस्रो इनिङ्ग्समा नटआउट ८९ रन जोडे । त्यसका लागि पन्तले १३८ बलमा ९ चौका र १ छक्का हिर्काए ।
त्यसअघि शुभमान गिलले ९१ रनको योगदान गरेसँगै भारत बलियो अवस्थामा पुगेको थियो । उनले १४६ बलमा ८ चौका र २ छक्का हिर्काए ।
चेतेश्वर पुजाराले ५६ रनको योगदान दिए। उनले २११ बलमा ७ चौका हिर्काए । वासिङटन सुन्दरले अन्त्यतिर २९ बलमा २२ रन जोडे ।
बलिङमा अस्ट्रेलियाका पाट कमिङ्ग्सले चार ४ विकेट लिए ।
अस्ट्रेलिया दोस्रो इनिङ्ग्समा २९४ रनमा अलआउट भएपछि भारतले ३२८ रनको लक्ष्य पाएको थियो ।
दोस्रो इनिङमा अस्ट्रेलियाका लागि स्टेभिन स्मिथले ५५ रन र डेभिड वार्नरले ४८ रनको योगदान दिए । बलिङमा भारतका मोहमद सिराजले ५ विकेट लिए । शार्दुल ठाकुरले ४ विकेट लिन सफल भए ।
त्यसअघि पहिलो इनिङ्ग्समा अस्ट्रेलियाले ३६९ रन जोड्दा भारत ३३६ रनमा अलआउट भएको थियो ।
अस्ट्रेलियाका लागि पहिलो इनिङमा मार्नस लबुसेनले १०८ रनको योगदान दिँदा बलिङमा भारतका टी नटराजन, शार्दुल ठाकुर र वासिङटन सुन्दरले ३-३ विकेट लिएका थिए ।
भारतका लागि पहिलो इनिङ्ग्समा शार्दुल ठाकुरले ६७ र वासिङटन सुन्दरले ६२ रन जोडे । बलिङमा अस्ट्रेलियाका जोश हजलउडले ५ विकेट हात पारे ।
